لاشفت رقمي يدْرِجْ حول شاشتك
ارميه يالمطفوق من فوق حوشك
بطوي سجلاتك كما طي فرشتك
واعطيك عهدي مخلبي ماينوشك
حصني منيع ولا تهزهز بهشتك
هون عليك ولا تورط جيوشك
أمراض عصرٍ جارنا الله تفشتك
واصبحت تحسبها بصرة قروشك
غرتك دنيا ياصحيبي وغشتك
تطرد وراها مع بواقي وحوشك
ماعرفت أميز ضيقتك من بشاشتك
متشابه ما أقدر أحدد رتوشك
وبانت عذاريبك وبانت هشاشتك
رعديد خفاشٍ بريشه يهوشك
ياكم كف وكف وكفوف عشتك
قطعتها ولفيتها مع نعوشك
تخفي رسوم الحق في رِحم دوشتك
ماتقدمه للي على الموت يوشك
واليوم عذرك لو صدر من حشاشتك
نزلت من عيني وتهاوت عروشك
ولاشفت رقمي يدرج حول شاشتك
ارميه يالمطفوق من فوق حوشك