عفا الله عن غدر الخناجر والضلوع أبطال
أبسامح وأتركك تحت الظلام الحالك لحالك
دخيلك وفر دموعك ترى هدر الدموع ذلال
وترى ما فيه احد يصبر مثل صبري بغربالك
أنا عيب على انقض كلامي والرجال أفعال
وإذا قلت اقطع حبالك تراني أبقطع حبالك
عشان اكسب هدب عينك تجرعت العذاب أشكال
وليتك ترأف بحالي عشان ارأف بحالك
مسوي في حياتي شيما يذكر ولا ينقال
حشا حتى العدو وهو العدو ما يعمل أعمالك
تمسيني على الهم وتصبحني على الغربال
تقلطني فناجيلك وتقصر عني دلالك
تحملت التعب لأجلك وأناحملي يهد جبال
رحلت من العذاب وما وقفت إلا على جالك
علامك كلما اجيك متواضع جيتني تختال
معاك أليا متى أبصبر وصبري معك يحلى لك
مثل ما أقبلت لعيونك لزوم تلد لي بإقبال
ومثل ما قد حشمتك حس وأحشم قلبي أشوالك
أنا محد بجابرني أسايرمعك ها المنوال
ترى لأني تبيع لك ولآني بأصغر عيالك
أنا جيت اعشقك نبض ومشاعر ماأعشقك تمثال
أنا جيت أسكنك وأحياك وأبقى فيك وأبقى لك
أنا جيت بظمى عاشق تعب يطرد سراب اللال
أنا جيت استفز رضاك من فرقاك والجا لك
أن ما همت بك عاقل أنا كنت أعشقك بخبال
أنا ما كنت احبك حي أنا كنت أعشقك هالك
تخيل من كثر ما خافت لقى للزعل مدخال
أخاف أخطي على طيفك وأدوس برجلي ظلالك
تبعتك والعرب تتبع رعود البارق الهمال
وصرت أقرب جسد يمشي معك بأقفال وإقبالك
أبي قلبك يحس انه فقد بمحبته رجال
ملكته من هدب عين وخسرت أرضاه بإهمالك
صحيح إن الفراق أقسى ولكن الوصال محال
وأنا صعب على أرضى غرورك واضعف قبالك
بعد ما حققت عيني فيبعدك للرقاد آمال
أعود للسهر.... يا اخوي فال الله ولا فالك
ببدل نظرتك فيني وأجي لك كل يوم بحال
باكون اقرب من ثيابك عليك ولا أتهيأ لك
بألمك وأنثرك وأجمعك وارجع أنثرك بإهمال
با خونك وازعلك وأرضيك وأزعل منك وأرضى لك
أباارسم بالثرى وجهك وأبا ادفن صورتك برمال
أبا اشكي للعرب فرقاك واضحك عند عذالك
أبا أهديك الوصال فراق وأهديك الفراق وصال
با سوي مثل ما أشوفك تسوي وافعل أفعالك
عشان تعرف من فينا الزعول ومن وسيع البال
أبيك تذوق فنجالي وأنا باذوق فنجالك
نصيحة واحتفظ فيها قصر معك الزمن او طال
أبي تسمع كلامي زين وتحطه على بالك
إذا حبك هبال أطفال لك عندي هبال أطفال
ولا وابشر بعد بهبال حب ما هو هبالك
وإذا قصدك تهين اسمي عشان تشمت العذال
حشا لا انته ولا غيرك ولا عشره من أشكالك