[منقاش]

يا بناتي ويا أخواتي : عسى الهادي يهدينا وأياكم الى سواء السبيل , وأنتبهوا ترونكم تمشون في غابه مليانه بالوحوش البشريه , وتعيشون في مجتمع مليان بالعقاب وألأفاعي .
والعيب ماهو في الكتابه في المنتديات , لكن العيب في أسلوب الكتابه , لأن الحروف لها صوت ونغمه وصدى , وألأسلوب عليه سحنه , ويحمل ألوان تدرج من ألأبيض الناصع البريء الى الرمادي والأصفر , ويستمر في التدرج حتى آخرها ألأسود , الله لا يسود لنا صحايف , ويستر أعراضنا وأعراض المسلمين , ويحمل (الأسلوب) أشارات يتفاوت ترددها , منها اللي على تردد التودد ومنها ومنها , مثل التقرب والتحبب والتغنج والتميع والخضوع في القول فيطمع الذي في قلبه مرض .
يا بناتي ويا أخواتي , فيه نساء وبنات شيمات شريفات عفيفات ما يخضعن في القول فيطمع الذي في قلبه مرض , لأنها أولا تستحي من الله اللي يعلم خائنة الأعين وما تخفي الصدور , وترجيه سبحانه في شبابها ومقتبل عمرها , ويوم مماتها وبعثها وحسابها , ثم تحشم في نفسها وربعها, وتحشم في أهل الفضل الحقيقي عليها بعد الله مثل أخوها وابوها وكل أهلها , ولا ترضى أنها تهين نفسها وتهينهم معها .
نعم : من يهن يسهل الهوان عليه ,, ما لجرح بميت أيلام ...لكنه صنف نعوذ بالله منه , ومن أنه يكون منا أو فينا أو بيننا .
يا بناتي ويا أخواتي : والله ماهو عيب الكتابه في المنتدى , وبعض الكتابات محثوث عليها وفيها أجر , وأتذكر عضوات كانوا يكتبون في هالمنتدى , وكانوا قدوه في كتاباتهم , وعلى سبيل المثال لا الحصر كاتبه ما أدري هي لا زالت والا تركت المنتدى كان معرفها بنت ألأصايل , هذي في حدود اللي أطلعت عليه من ردودها كانت نبرة كتابتها تنم عن أنسانه محترمه , وغيرها كثير , عسى ربي يكثر من جنسهم .
ونصيحتي لمن تحشم في نفسها أنها تكتب بمعرف رجل حتى ترفع الحرج عن نفسها , وأذا كتبت بمعرف نسوي تحفظ في كل كلمه تكتبها , وتنتبه وتاخذ حذرها حتى من المعرفات النسائيه , لأن بعضها لرجال يتشبهون بالنساء نسأل الله العفو والعافيه .
أنتبهوا يا معشر النساء من المعرفات الرجاليه , ترون اللي يخاطبونكم من خلف الشاشات أكثرهم لا يعقلون , ومع حقارتهم يحتقرون المره والبنت اللي تلاينهم في ردودها , أنتبهوا الله يحفظكم بحفظه , ترون في كل عشره سبعه على ألأقل لآخير في نجواهم , أنتبهوا , وأطعن الله وأطعن الرسول , ولا تخضعن في القول فيطمع الذي في قلبه مرض .