[منقاش]

يبو يوسف أنا أحسدك على توقيعك , وأرجيك تسامحني , لأن ما باليد حيله ...
أما المشكله اللي تشكي منها فحلولها سهله وبسيطه , وخليني أعطيك أياها :
الحل ألأول , أنا واياك راح من دنيانا الكثير ولا بقي ألا القليل , وادع الله يهدينا للعمل الصالح الخالص لوجهه , ويتقبله منا حتى نفوز بالدار اللي نزع الله من قلوب أهلها الغل والحسد , وهي الجنه , جعلني الله وأياك ووالدينا وجميع أهلنا , وألأخوه القراء من أهلها ,,, أما الدنيا الدنيه فلا بد من الحسد والتحاسد فيها , وقليل اللي عصمهم الله من هالداء .
الثاني , الدنيا اليوم فيها خير كثير ومتسع لي ولك للبعد عن الحساد , يعني , الناس اللي تحس أنها تكره الخير لك , قلل من أتصالاتك معهم الى أدنى درجه , أن قدرت بدون يشعرون , وان ما قدرت قول لهم , لا رجع الحمار ولا أم عمرو , والمثل يقول , أذا ما بقي على الفقر ألا قدح أكسره .
الثالث , أحتسب واصبر , يعني أصبر على ألأذى , لكن خلي صبرك خالص لوجه الله ..
الرابع , رد على النار بمثلها , وعلى التحيه بأحسن منها , يعني , رد على الحسد بمثله , واحسد اللي يحسدك , والظلم بالظلم والبادي أظلم .
وأذا كنت عاجز , أنا عندي لك واحد عيونه شهب ولا يقوم منها أحد , وياخذ ألف ريال مقدم واربعه آلاف مؤخر على العين اللي تدخل راعيها القبر والشهر ما غلق , وياخذ خمسمية ريال مقدم والفين مؤخر حتى يشل لك واحد من أطرافه ألأربعه .
لكني ما أنا مستعد أدلك عليه ألا بعد تحط في يدي خمسين الف ريال , وتعاهدني أنك ما تشغله ضدي , ولا تعلم به أحد غيري حتى لا يستخدمونه في معارك جبل الدخان ..

ملاحظه : تراه يشهب اللي تبي حتى لو من خلال معرفه اللي في الكمبيوتر , أو من خلال صوته المسجل, وأظن أني مضطر أستاجره لبعض أعضاء منتدى الحياه الفطريه اللي يناكفوني في بعض ألأحيان .
بعباره ثانيه , ما تحتاج توريه الرجال اللي تبيه ينحت به على الطبيعه , والله يرحم قتلاه اللي قضى عليهم بهالطريقه مثل ابو عمار والحسين بن طلال الله يرحمهم , لكن الله يعينك تزود له المبلغ لأن الحسد الألكتروني غالي واجد بسبب أستخدام ألأثير ..