[ماندم من سكت]

ياصاحبي خذها من الـراس للـراس
( والهرج يغني صامله عـن كثيـره)
ما من ورا هرج القفى غير الإفـلاس
و ما من ورا كشف السراير ستيـره
المرجله فعل(ن) تستّّـر بـه النـاس
من جود وإلا من سيوف(ن) شطيـره
ما فيه نفس(ن) ما لها عرق(ن) وساس
والخير به شـر(ن) وبالشـر خيـره
لو الجبال بوصفها مثـل الأطعـاس
كل(ن) لقى من يستشيـر و يشيـره
ما كل قول إل/عزة النفـس مقيـاس
ولا كل رجال(ن) يسـاوي عشيـره
من بيّع الخرده على قـب الأفـراس
عينه بلا شوف(ن) ورجلـه كسيـره
ول و خذته القوم ,, والخيل نومـاس
عديم شـور و لا يحاسـب ضميـره
جات وشراها ,, وهافي العرق دساس
للناس عرف ,, وللعـوارف بصيـره
شارب حثالة قارع الكأس بالكـأس
لا طالت ايدينـه و لا هـي قصيـره
طهارته خزي(ن)من الرجس محتـاس
وحل(ن) تناقر به عقول(ن) صغيـره
سود الوجيه أحفاد حاقـد و خنـاس
هذا رسول(ن) لـه و هـذا بشيـره
النقص لا صاب الرجل جاك بـلاّس
يسب نفسه قبـل لا يسـب غيـره
ما هو كفو بن(ن) و هيل(ن) و محماس
ولا هو كفو إل/ثايـرات الذخيـره
عده ,, من اللي تحت الأقدام ينـداس
و ترقد عيونـه هانيـات(ن) قريـره
توني يغني و ضارب الطبلـه إليـاس
و سهير قيسـي مملكتهـا الحريـره
سوالف(ن) تنقل من النـاس للنـاس
يلعنك من ناس(ن) و يلعنـك ديـره