[منقاش]

الحفر في الصخور يحتاج لتلغيب , وحتى يلغبون كانوا يخرقون بالعتل في الصخور الصماء خروق دايريه , كل خرق بوسع العتله(قطره ثلاثه أصابع تقريبا , وعمقه ذراع تقريبا).
ثم يعبونه بالبارود اللي كانوا يصنعونه بأنفسهم (صناعه محليه), ويدكونه بعصا (عود) ثقيله وصلبه وسمكها بمتن العتله أسمها المدقاق , ولا يدكون البارود بالعتل حتى لا تولد العتله شراره تفجر فيهم اللغب .
وبعد الدك يوصلون بين الحفر ببارود , ويرمون عليها من راس البير بجحفة جمر حتى يشتعل البارود اللي على وجه الصخره ويفجر بارود الثقوب (الحفر).

ألآبار اللي جمها غزير وعرضها وسيع ومسقويها كبير وكثير , يبنون عليها أسطوانتين ومجرتين حتى يسوق عليها فريقين للسواني , كل فريق مستقل عن الثاني في السواني ومحلات الري .

ألأسطوانه مكونه من جدارين بارزه من أسفلها عن القف جهة البير,



وترتفع حوالي ثلاثة أمتار للأعلا, كل جدار على هيئة مثلث قايم الزاويه يفصل بينها مسافة ثلاثة أمتار أو أكثر ,



هي حيز القف اللي تصب فيه الغروب , وهو عباره عن حوض أطواله ثلاثه في أثنين ونصف متر تقريبا , ويفصله عن راس المجره حاجز من الصخور يسمونه الصافق لأنه يصفق الماء المندفع من الغروب ويوجهه للفلج أو الماجل , ويصفق حيوانات السواني حتى لا تقتحم القف , وعلى الرغم من أن الصافق من الصخور الصلبه جدا , لكن حبل المقاط اللي من جلد يحز في صخوره مجرى واضح مع مرور الزمن ..
وحتى لا ترتطم الغروب بجدران الطوى , يبرز جزء من القف فوق الماء داخل البير مثل بروز البلكونه للخارج جهة الشارع , ويبرز أكثر من بروز القف الضلع القايم من جدار ألأسطوانه , ويحمل هذا البروز من ألأسفل أحجار طوليه تسمى الكلب (بضم الكاف واللام) ومفردها كلاب (بضم الكاف وفتح وتشديد اللام , ويمكن جمعها بالكلاليب.



على جوانب جدارين ألأسطوانه من الداخل من مايلي القف , عودين خشب موقفه بشكل مايل جهة البير , ومرتكزه من أسفلها على أرضية القف , يسمونها الحوامل , وعلى أرتفاع خمسين سنتيمتر تقريبا يربط فيما بينها بشكل عرضي عمودين من الخشب متوازيه يسمونها الكفافه , يربط بينها أربعه توصيلات عموديه من الخشب تحمل الدراجتين يسمونها الضلعان.
ويربط بينها (الحوامل)في أعلاها عمود من الخشب بشكل عرضي يسمونه القناع , وأدنى منه بحوالي متر ألا ربع يربط بينها عمود خشبي عرضي يسمونه الواسط موازي لعمود القناع , ويثبت بين الواسط والقناع أربعه أعمده من الخشب يسمونها الضلعان , أثنين في اليمين وأثنين في اليسار تحمل المحالتين , كل أثنين تحمل محاله وبينها فراغ تحت المحاله مباشره يسمح للغروب تصب معه ماها ..

الخرزه : هي عنق البئر اللي يبرز بناه على وجه ألأرض لصد السيول من أقتحام البئر والتسبب في تلويثها أو دفنها بالطين والمخلفات .