[ابوسيفين]

المشاركة الأصلية كتبت بواسطة منقاش

حليفي الوفي الشيخ ابو سيفين : يبن عمي رايح أعلمكم بالمزمول في لغة المسلمين الثملان , أما المزمول في لغة عرب الجاهليه المشركين, ثملان والا غيرهم , فهذي نتبرى منها ونتركها للشيخ سلام من باب أعطي القوس باريها ..
الزبده , يا حليفي , ناظر صورة الخوي حقي (اللي تحت صورتي) , خوي الجنب أبو بردعه , أو سمه البرادعي أن رغبت .
وبكلام أبلج مثل الصبح : حمار الطرقه (السفر) (كرمت أنت ومن يسمع) يسمونه الزامله , وكان أهل الزمل (الحماره) والجماله (أهل الجمال) أذا عزموا على الهبطه للطايف أو الشديد من ديره لديار ثانيه , ونصاهم خوي ماعنده راحله , وطلبهم الرفقه والأخوه , يرحبون به ويقولون , سعدك بالخويا يا سوي الروح , تراك محمول مزمول .
يعني محمول على زامله , ومزمول بخوي , واللي هو غالبا راعي الزامله اللي يردف المزمول وراه على زاملته , أو يتناوبون على ركوبها .
وفي غياب زوامل الماضي في زمن المواتر , المزمول هو اللي معه خوي أو مجموعة خويا أو سمهم زملا, وسلامتك ....

وفّيت وكفّيت ياشيخ ليته يتهيا لنا رفقتك محمول مزمول وترى الرّحله القادمه في شهر (( 3 )) بمشيئة الله ومُدّتها المُقترحه أسبوع والمقاعد محدوده حسب قائد الرّحله إن رغبت أنتظر تواصلك 0
وعلى فكره أحسن الله عزاك في صاحبك الذي عرّفتني عليه قديماً ويقطن الحويّه ولعلّك تدعو له بالرّحمه والسّماح 0