[منقاش]

رد: اعتذار وقصص رد: اعتذار وقصص رد: اعتذار وقصص رد: اعتذار وقصص رد: اعتذار وقصص

حليفي الرحاله الكبير الشيخ أبو سيفين , يحفظه الله .
عليكم السلام ورحمة الله وبركاته , وكل رحله وأنت بخير , وبعد :
أول غلطه لا تغتفر أرتكبتها , نسأل الله العفو والعافيه, هي أنك أستشرت ابو عبدالرحمن في نوع الكمره اللي تقتنيها , وفاتك , أن مشرفنا العام تلميذ أبتدائي في مدرسة المصوراتي حليفك أبو نقشه , هذا أولا ..
وثانيا , تقرير رحلة الديدحانه ملكلك ومعصلج ومتربس من البدايه وأبي لا ينسمح أو يتسهل ,أبى , أبى , بكمره وبدونها ..
مواعيد ألأثنين كانت مواعيد عرقوب لها مثلا , وآخرها هالليله ألأثنينيه اللي ما جاك هاجس الشعار ألا في منتصفها ..
والديدحانه , الورده الجميله البريئه, صفا عليها الماء وكأنها ما كانت في يوم من ألأيام عنوان الرحله .
وفجأة وبدون مقدمات , طلعت علينا رحلة تبوك وحلت محل الديدحانه ..
لكني أقول بعذركم , ولا هي غريبه من الديدحانه , ولا هي غريبه منكم وانتم من أهل آخر الزمان , ومن اللي ما بقي عليهم شي يشوفونه من الأمارات ألا ظهور الدجال والعلامات الكبرى.
طيب وين باقي العلوم اللي أهم من الديدحانه بمليون مره ,, واللي لمثلها تشد الرحال ؟.
جبل اللوز أبو قبعه سوداء , طلع طريقه طويل وعسير , واعلاه مسلك وممنوع ألأقتراب منه , والمذبح والعيون ألأثنعش راحت في خبر كان .
يعني , تقرير مثل تقارير صحافتنا وتلفزتنا , وانتم بعذركم ..
وهو من متى أحد يقدر يخرج عن سكتنا , ولا يتأثر بثقافتنا ويعتم مثل عتمنا وعرعرنا ؟؟.... وهو من هو اللي منا ما يسلك مسالكنا , ويخلي العلوم ملحفه بالجلايل , ويخلي سوالفه مسبكه ومسلكه بحدود السلوك واللوحات التحذيريه اللي يلقاها على ألأرض ؟؟..
وأخيرا , لأن الكمره ما تردها الحواجز , ويمكن تجيب الخبر من سد السلوك والموانع , وصورها ربما لا تقل عن علوم جهيزه اللي قطعت بها قول كل خطيب , أخيرا نفبرك دعوه ونلبس فيها الكمره بالتهمه , وننحي باللائمه عليها ,, ونتهمها بكل التهم ظلما وعدوانا...
ويش اللي باقي ؟؟, ما باقي ألا التلبشات والدعاوي والأدعاءات , والظنون والتذرع حتى بالغيبيات ,, وشوية أعتذارات مبرره بتوزيع الأتهامات هنه وهناك حتى على العوينات والكمرات , وعلى حنادي ابو تركي اللي دوبه وصل لألف باء التصوير بمساعدة مصري يمسك يده ...
الله يوفقك ويهديك يا حليفي يبو سيفين, حتى الطاير أبو حنا البريء رديتوه جني متحني , ولبستوه جزء من التهمه ؟؟.
لكن , خذ كلام حليفك اللي يجمد عليه الشارب ..
أنا أستبعد أن من بين خوياك أحد يقدر ينشن ولا تبندق بندقه , أستبعد قبل أقبل منك أي أتهام تنحي فيه باللايمه على أحد .
ألا أن كان معكم أحد من جهة علو الديره مثل ابو نقشه ,, فهذي ألأتهامات وقتها محتمله حتى لو بالأي ميل أو البريد التكروني, لأنهم مشهورين في هذا لجانب كابرا عن كابر , والأصاغر يا ساتر ,, ولا ينبؤك مثل خبير , خصوصا وانتبه هنه لخصوصا , خصوصا أن كان من بين خوياكم أحد من جهة حصن المسيل , أن كان فيه شي من هالكلام , فلا تقول ألا يااااالطيف , رحتوا فيها وراحت معكم كمراتكم .
ويش اللي باقي ؟؟ , أنا ما أستبعد أن بعض خوياك شافوك مندفع بلا حدود في مجال التصوير , وحتى يحيدونك لخبطوا عليك بعض أزرة وتوصيلات الكمره .
الحل : الرجال اللي طلب منك لا تصور بعض ألأشياء وابيت لا تعيره سمعك , أمسك فيه ووجه التهمه له , وهو اللي عارف بلى كمرتك .. وسلامتك..