[منقاش]

رد: من المفردات القديمة ج(5) رد: من المفردات القديمة ج(5) رد: من المفردات القديمة ج(5) رد: من المفردات القديمة ج(5) رد: من المفردات القديمة ج(5)

مشكوره يا مشرفتنا يا سنافيه على هذا الجهد المتميز , واحب أنوه أن الغنم والضان متردفات , ولا يدخل ضمنها الماعز, وأذا قالوا أهل الغنم أو رعيانها أو غنم فلان من الناس, شمل المعنى الغنم والماعز من باب التغليب .
والشاه هي أنثى الضاينه اللي من الرباع والثني ودون , والنعجه في العاده هي الكبيره من الضان مثل السدس والقارح , ويمكن تطلق على الضان كلها ويقولون النعاج من باب التغليب ..
شرب الدم تفجأت به لأني أول مره أسمع به , وأخرت مداخلتي حتى أسأل عن هالخبر , وفعلا سألت واحد من كبار السن(في الثمانينيات) , وذكر أنه سمع أن هذي الفعله كانت تحدث , بطبخ المشاوي مع الدم , لكنه ما عمره حضرها ولا شاهد أحد يفعلها أمامه في حياته ..
الغنم لها سرحه ولها مرواح ولها مفلا , ولها مراح , ولها مقيال أيام القيض أن صدف راعيها في المفالي شجره أو مكان ظليل يناسب المقيال , ولها ميراد يوردها راعيها عليه حتى تشرب منه ويصدرها , وأحيان في أيام الشتاء أذا كان ميراد الماء بعيد يغب(بكسر الياء والغين) الراعي رعيته , واليوم اللي تكون الرعيه فيه مغبه , هو اليوم اللي ما ترد الماء وتبقى عطاشى ..
الجنب (بفتح الجيم والنون) , هو الحلال الكبار اللي ما يسرح مع الغنم , مثل الكبار من البهم , ومثل الوالد , والكسيره اللي في جبارتها , والعليله وغيرها ....
الشاه والعنز الداره , هي اللي مليان ضرعها (ديسها) حليب , وغالبا تكون مرضع , و حتى يقاسمون رضيعها في الحليب , يشملونها بالشماله (بكسر الشين وفتح الميم) حتى تغرز (بفتح التاء وتسكين الغين وضم الراء) , ووقتها يسمونها غارزه , وأحيان تكون نافر ما ترضع طفلها , ووقتها تحتاج لمسك حتى يشبرون طفلها منها بالقوه ..
رعية الغنم تعلم راعيها كيف يسوس الرعيه , لأن الغنم فيها الضعيفه وفيها النطوح وفيها الخمول وفيها الصغير اللي يحتاج لعنايه ورعايه خاصه , وفيها وفيها , الخ ..
والمفالي , فيها ألأحميه اللي يمنع الرعي فيها , وألأقتراب منها أقتراب من المحظور , كالراعي يرعى حول الحمى يوشك أن يرتع فيه , وفيها الحجر المحجوره لرعي أهل قطرها , وفيها المفالي اللي مرعاها وخيم ويسبب للرعيه أمراض تحبط منها مثل القاتل وغيره, وفيها وفيها ..
والرعيه يمكن يشقيها راعيها ويصرفدها , ويتسبب بجوعها وهزالها , ويمكن يحسن رعايتها حتى يدر ضرعها ويكبر صغيرها ويسمن كبيرها .
ورعي الرعيه فن , يكفكف فيه الراعي الرعيه على ما ينفعها ويردها عن ما يضرها بلطف وحزم مجتمعه, وينتبه لقاصيتها ودانيها من الذياب والسباع المفترسه , ويحدها عن الرعايا الثانيه حتى لا تختلط بها ألا في حدود تحقيق المصلحه ودفع المضره , ويمنع قويها من نطح ضعيفها , ويتفقد أحوالها واحده بعد الثانيه , ويعدها أذا ضوت لمراحها حتى لا تعزب عازبتها وتفترسها السباع, الخ...