[منقاش]

عميد منتدى الحياه الفطريه , الشيخ سلام , سلمه الله : أشوفك تحيل لسماحتنا بعض المصطلحات الغنميه المتعلقه بصغار الغنم , على أعتبار أن ابو نقشه فحل من فحول هذا العلم (علوم الغنم) اللي ندر المتخصصين فيه , في هذا الزمان المهيا .



على كل حال , بخصوص أسامي صغار الغنم :
الضاينه : المولود الصغير يسمونه رعص للذكر ورعصه للأنثى , ورعوص للجمع , ويبقى الرعص رعص طيلة فترة الرضاع , وأذا بدا يقرم (بفتح الياء وتسكين القاف وضم الراء ,,, يعني , يرعى على خفيف) , يسمونه طفيل وطفيله , ثم أذا أرتفع شويه سموه طفل للذكر وطفله للأنثى , وطفال للجمع , وأذا كبر أكثر يسمونه همير للمذكر وهميره للمؤنث , وهمران للجمع , ويصبح في هالسن مناسب لفصله عن رعية البهم اللي ما يسرح الجبل , ويلحق برعية الغنم اللي تبتعد عن المراح واجد , ومفاليها تكون بعيده نسبيا ..



الماعز : الرضيع الصغير يسمى سخيل للمذكر وسخله للمؤنث , وسخل (بفتح السين والخاء) أو سخلان(بضم السين وتسكين الخاء) للجمع , وتستمر فترة السخاله حتى يبتدي السخيل يقرم .
وأذل فطموه الحقوه بالبهم والرعي , وسموه هريد أو هريده , والجمع هردان , وأذا أصبح في سن فصله عن رعية البهم والحاقه برعية الغنم يسمون الهريد جفر والهريده , جفره ...
باقي التسميات تعرفونها من المداخلات السابقه الخ ...



والرعيه اللي تضم الماعز والضاينه , رعايتها شايكه , بسبب أختلاف السرعه , والقدره على المشي والتسلق , فالماعز سريعه في مشيها , متسلقه بارعه للصخور والأشجار , لبينما الضاينه تفضل السهول ولا تسلق المناطق الوعره ولا ألأشجار ...




والرعية تفهم مشاعر راعيها وتفاعل مع معاملته , وربما أحبته من لطفه بها واحسانه عليها , والماعز في هالجانب أكثر من الضاينه في حرارة هالعلاقه الحميميه .
وأضرب لكم عن هالظاهره بمثال , بطل القصه فيها , رحيمي أبو بندر اللي كان قبل سنوات يربي كم راس من الغنم , وكان يبر جفر من بينها بالأكل ويدلله بالملاطفه , وفيما بعد أضطر يبيع الرعيه على واحد من زملاه .
وبعد فتره ما طالت واجد , زار ابو بندر خويه , وكانت الغنم داخل شبك , وبقي الجفر يسعى من جهه للثانيه يتابع في أبو بند اللي كان يدور علي الشبك من الخارج , وأذا أقترب من الشبك عنق ورفع أديه وحط أضلافه على الشبك ووقف على رجليه ومد راسه جهة ابو بندر , كأنه يبي يعانقه .
الخلاصه : غادر أبو بندر هاك اليوم خويه وشبك غنمه , وكان الجفر يتابع فيه بالنظر , ويسعى من جهه للثانيه , ويعنق في الشبك حتى أختفى عنهم .
وفي اليوم الثاني قابله خويه , وبلغه أن الجفر ما طول بعده ومات (بعد مرواحه عنهم) , يعني في مساء يوم الزياره نفسه ...