[منقاش]

رد: هل للسفر فوائد غير ماذكره الشافعي رد: هل للسفر فوائد غير ماذكره الشافعي رد: هل للسفر فوائد غير ماذكره الشافعي رد: هل للسفر فوائد غير ماذكره الشافعي رد: هل للسفر فوائد غير ماذكره الشافعي

يالله مسا خير , أمسينا وأمسى الملك لله , وبعد :
خلونا نبتدي بالترحيب بالعضو الجديد في حلفنا الرجال الحليف العاقل , فمرحبا بالعاقل , حللت أهلا ووطأت سهلا , وموت يالمخاوي كمدا وغبنا ..
وبعدها نتحول للعربي ماهو للانقليزي , وأقصد بالعربي الشيخ العربي , وأقول يا ابن عمي يا عربي , أنا من متى أفتيت ؟؟ .
أن كان قصدك فتاوي ولد أم محمد , فهذي فتاويه ماهي فتاويه , وثيابي ما تاسع أحد غيري , ولا تقولون ابو نقشه شي ما قاله .
وان كان قصدك تعرف رايي في ألأسفار بأمانه؟؟ , فلا أقول لك ألا خذ راي الشرع , واحسن القصدأولا , واستفت قلبك وأن أفتاك الناس وأفتوك , وتذكر أنما ألأعمال بالنيات .
وان كان قصدك تعرف البلاد المناسبه للسفر ؟؟, فحسب الغايه , فلو كنت مثلي من هواة الطبيعه البكر العذراء الجميله جدا , فلا تقدم على أثيوبيا بلد , ولكن بشروط , أولا , الرفيق قبل الطريق , يعني الخوي أو الخويا المناسبين . ثانيا , أذا وصلت عاصمتهم تمر أول يوم على سفارة بلدك وتسجل جوازك وتعلمهم برقم جوالك ووجهتك وتحتفظ برقم السفاره معك . ثالثا , تختارون دليل أو أكثر خبير بالناس وبالطرق البريه , وتستاجرون خيل والا حمير وتسافرون جهة أعالي النيل ألأزرق وشلالاته وبحيراته . رابعا , تشتري معكم (من عاصمتهم)مستلزماتكم للسفر اللي منها الخيام البلاستيكيه الصغيره اللي أذا قفلت سحابها ما تدخل عليك الديبان وانت نايم , والنواظير , والجزم المناسبه وووو الخ ..
وان كان قصدك ألآثار فمصر من أهم ألأمصار , بشرط أنك تمر كما قلنا على مدافن الفراعنه ومعابدهم وأهرامهم والمتاحف اللي تحوي تراثهم , وتركيا تجمع الطبيعه مع ألآثار ...
وأن كان قصدك العمران المتقدم والتمدن والملاهي العايليه وتسليات بزرانك والمساجد الجميله ومعها كلها جمال الطبيعه , فلا تقدم على ماليزيا بها الدنيا بلد ..
وأن كنت رجال تبي تفكر في دورة القرش في يوم من ألأيام , وتبي تدير أعمالك بنفسك ولا تسلمها لغيرك , فلا تخطي الصين ومعارضها التجاريه وشركاتها الصناعيه , وفي مقدمتها معرض كوان زو , زور الصين ورايح تنبهر من النهضه العمرانيه والصناعيه في هاك البلد , وتمنى الحصول على الجنسيه الصينيه , وانتبه ترى المعارض لها تاريخ ولها أجراءات دخول تبدا أحيان من السفاره أو القنصليه في السعوديه..
وأن كنت تبغي ألأهانه ووضعك تحت الرقابه روح (u , s , a) وأبشر بما يسرك , يعني أول ما تحط بك الطياره في مطار كندي , يفتشونك تفتيش قطاع الطرق , وشنطك تكون قد مرت على الكلاب البوليسيه وأنفتحت بدون علمك , وأن كان معك كمبيوتر تصفحوه وأولوا اللي فيه تأويلات باطنيه وربطوك بمصايب ما تخطر لك على بال .
وهذا كله يهون مع الجهاز اللي تمر عليه ويكشف عن عورتك , والجهاز يهون مع تزليطك ولمس ألأعضاء الحساسه من جسمك حتى يذكرونك بشريطية الغنم عندنا وهم يقلبونها, وكل ما سبق ما يجي قطره في بحر كارثة التفتيش اليدوي لمؤخرتك , وعلى يد من ؟, على يد عتاوله من السود والبيض اللي يخرعونك من مجرد النظره لهم , يعني أن كنت رجل حر , ما معك ألا تطلبهم يردونك على الطايره اللي جابتك , والا رحت في مية داهيه , وسلامتك ...