يا مرحبا عداد ما سيّر السير
وعداد ما حل الحيا في جباله
وعداد همال المزون المصابير
وأصبح خضار العشب كاسي رماله
وعداد ما حنت حنين البوابير
تحوفها الأمواج من كل جاله
فوق البحور محمله بالقناطير
يقودها الربان قود الزماله
يقودها حامد بحكمه وتفكير
تاجر ويعرف كيف يصرف رياله
حامد ليا لفت عليه المحاوير
من متجره ما جابها من بقاله
الشاعر الي فسّر الحلم تفسير
ويقولها بين ابن عمه وخاله
يا بو محمد ما تضيق الحناجير
إلا بمن فيه الغبا والجهاله
يعجل ويقصر حبل دلوه من البير
والآخره تمرس عليه المحاله
وإلا ليا صفّت عليه الطوابير
يندم على حاله وياقف لحاله
يا بو محمد عمّر البيت تعمير
وليا بقي شي على الله بداله
ما دام بن سلمان نجم المحاضير
الي سواتك ما يقصر حباله
حث الركاب وسعّر الهرج تسعير
تكسب مع الأصحاب قاله وطاله