[منقاش]

عليكم السلام يا ابن همام ورحمة الله وبركاته , وأحسنت أحسن الله اليك , وكثر الله من أمثالك , وشكر الله لك على هالمبادره اللي عرفتنا فيها هذا التعريف الشامل , على نبته من نباتات ديارنا كانت غايبه عن أذهاننا , والا كان ما تركناها لك حتى سبقتنا عليها , وبعد :
فعلا كما قال القايلين , ألأولين ما خلوا للتالين شي , ما تركت أنت والأخوان الكرام اللي جوا من بعدك لنا شي نقوله بعد ثليتم وكردشتم وغزلتم وكوفتم ونسجتم كل علوم الحسك .
أقول وفيت وكفيت يا ابن همام , ولا أظن بقي عندك ألا منبوبه واحده نبها عليك ابن عمك زعيم الشعراء , يطلبك فيها المذهب والخاتمه في الزاهقه اللي جات منك على الشعار .
أما أنت يبن عمي يا سنا الهجره , فلا أقول لك ألا وسع صدرك , وترى المقاله اللي قالها ابن همام مدحه ماهي لدحه , لأنه ما فيه أحد شاعر والا راعي أباعر ألا ومعه قرين مقترن به , ويسوس له بالليل والنهار , وفي الصلاه وعرض الفلاه , وفي اليقضه والمنام , بعلوم كلها دنفسه وخنفسه , نعوذ بالله من الشيطان الرجيم .
وأذا كان هذا حال أبليس مع العامه والخاصه وخاصة الخاصه , حتى ابونا آدم وامنا حواء ما سلموا منه وهم في الجنه , فلا يعقل أن الشعار خارجين عن هالقاعده وشاذين عن هالفرضيه , ولا أظنه يعيبهم أن قال قايل أن شياطينهم تهوجس لهم حتى يبدعون في نظم القوافي , وسلامتكم ...