[منقاش]

بيض الله وجهك يا حليفي يا عمده يا مقداد يبن ألأسود .
بيض الله وجهك ولا بقي ألا نقول أنه من أيام جدودنا حتى هذي حدودنا ونحنا ناخذ ونبقي في أحكامنا ونقول ,المحكمه ثلثها مركوز وثلثها مطروح وثلثها يضوي .
لكن ويش اللي بقي يا حسره من هالمحكمه ؟ , أوكما يقول القايل , ويش الديك , وويش هي مرقته ؟ , يعني ما بقي معنا من النصبه أو المنصوبه ألا قايمه وضلعين دوبها تعشي بس أبن همام لو جابه معه ليلة المضوى .
لكن ما لها حل ألا نعفي ونسير من أهل الصفح والعفو عند المقدره , ونقول بيض الله وجهك يا عمده وبيض الله وجه ابن همام وجميع ألأخوان , وهذا موقف من مواقف أبو نقشه اللي يبغي التاريخ يسجله له بأحرف من ذهب مع بقية مواقفه العربيه المشرفه ... هذي ألأوله .
والثانيه , يا ربعي البارح ما كحل النوم عيون ابو نقشه , وطيلة ليلي وأنا أضرب أخماسها في الأسداس وأقول , يا بدر الدجى طالما أن العمياء زراعتها بهذي السهوله الى درجة أنها تنبت في ألأراضي المهمله , ولا تحتاج من الماء والعنايه ألا لأقل القليل , ولا تحتاج لشبوك ولا أسوار لحمايتها من بهايم خلق الله السايبه .
ليه ما تسرح بكره على بلادك وتزرعها بالعمياء كلها من صدورها حتى مغضها ؟, ثم تشتري لك هاك المكينه اللي تحلب بها حليبها والثانيه تنشف بها ورقها ونواميها , وبعدها تبيعها على شركات ألأدويه في أستراليا وغيرها من بلاد الكفره الفجره , واللي يمرض من ربعك تسففه بعضها حتى تقضي عليه وتريحه وتريح البلاد والعباد منه ؟ , وأذا لقيت لك درب على المخاوي وطاح في يدك تحاول تدس له سفه مع شوية ملوخيه , وأن شاء الله ما يخطى الشيخ سلام من أجره (المخاوي) ولا من أجر التنوير اللي نورنا به في هذا النفق المظلم عن هالشجره المباركه , وكما يقولون , الدال على الخير كفاعله....
ويش رايكم في هالأستثمارات؟, تحتاج لدراسة جدوى والا نتوكل على الله ونسرح على البلاد ونزرعها؟؟.