[منقاش]

يا ربي أنك تهديهم وتهدي عيالهم الى سواء السبيل .
الضرب والتعنيف (وحطوا خطين تحت التعنيف اللي ما تاخذونه في الحسبان وهو تحطيمه وآثاره غالبا أشد من الضرب) .
أقول الدلال يسمجهم والضرب والتعنيف يدمرهم , والضرب والتعنيف خطا ما يحد عليه ألا الضروره القصوى اللي ما بعدها ضروره وفي أضيق نطاق .
لكنكم الله يحفظكم نسيتم أمور مهمه في التربيه , وأولها الدعاء لهم بالهدايه والتوفيق , ومن يضلل الله فما له من هاد .
وأذا ما تبون تدعون لهم على ألأقل كفوا أذاكم عنهم ولا تدعون عليهم , والأم والأب اللي يدعون على عيالهم يحتاجون (ألأبوين) الى تربيه وسحب رعاية أطفالهم منهم .
والأشد منهم اللعانين اللي أحيان يلعنون عيالهم مصبحين وممسين , وبعضهم يداعب عياله باللعن والعياذ بالله , وناسين أو متناسين أحاديث النهي عن اللعن وحديث الناقه الملعونه ,,, هذي ألأوله ..

والثانيه , أنكم ناسين ألأهميه العظيمه للغة ألأشاره في التربيه , ومنها علامات الرضى في بعض ألأحيان والأستياء في أحيان أخرى واللي تظهر على تعابير الوجه ونبرة صوت الوالدين وبقية لغة الجسد .
وناسين أن سلوك الوالدين ينعكس على سلوك ألأبناء , وان عيالهم يولدون على الفطره وهم اللي يهودونهم أو ينصرونهم أو يمجسونهم أو يقللون أدبهم , وأنهم قدوه لعيالهم , والأب والأم اللي تمعر وجيههم أذا شافوا أو سمعوا منكر , عيالهم يكتسبون منهم هالصفه لا شعوريا , ووو الخ ....
والثالثه , بعض ألأباء يحط أطفاله في بيئه فاسده مفسده ويبغيهم يصلحون , وينسون أن المرء من جليسه , وأن الطفل وحتى الرجل الكبير يتأثر ببيئة ألأطفال والكبار من حوله .
بعباره ثانيه , الجار قبل الدار , واذا كان لك جار أو جيران تربيتهم لعيالهم ماهي طيبه , شد حالا من جنب ألجربان لا يعدونك بجربهم وارحل , وان كان البيت لك بيعه والا أجره ولا تأسف عليه واستاجر غيره ..
والرابعه : أختلاط عيال ألأقارب والمعارف الصغار في المناسبات يجب أنه يكون تحت أشراف عقلاء من أهل الفطنه والذمه , والا جلس عيالك جنبك , وان ما قدرت بلاشي من التجمعات اللي يحضر فيها ألأطفال .
وترون اللي درسوا كثير من ألأنحرافات وجدوا أن أغلب بلاوي السلوك وسوء التربيه مصادرها عيال القرايب والحبايب اللي تجمعهم الكشتات والرحلات والطلعات والأفراح والليالي الملاح ..
روحوا بعيالكم على جنب واملوا فراغهم بالمباح من المسليات, وارحموهم في التعامل واستعينوا بالله على تربيتهم واصبروا ولكم ألأجر أن شاء الله , وتذكروا أن الرفق ما وضع في شيء ألا زانه ولا نزع من شيء ألا شانه ..