[منقاش]

أخونا العزيز السيد الحسيني ,,, لا شكر على واجب وخير الناس أنفعهم للناس , وبعد :
بخصوص سؤالك عن أنسب وقت للرحله لسريلانكا ولمنهاتن الشرق ؟.
الجواب , في أجازة الربيع أو منتصف العام (وقت البرد عندنا), والسبب أن الجو يعتدل أو يبرد في هالفتره في منهاتن الشرق , أما سريلانكا فيتضاعف الجمال أضعافا مضاعفه , وترى العجب العجاب في مناطقها الجبليه , ترى شي ما يخطر لك على بال من الجمال , لكنه موسم الذروه السياحي عندهم وترتفع أو تضاعف أسعار فنادقهم ..
أما أذا كان السفر في الصيف ما عنه مجنابه بسبب طول أجازة ألأولاد , فلا عليك ألا شرا تذاكر على ألأماراتيه على خط السير جده كولمبو مرورا بدبي بالمبلغ اللي سبق وبينته لك , ولا بد أن ألأطفال لهم تخفيض .
وفي الروحه أو الرجعه أطلب من ألأماراتيه أسبوع والا أسبوعين في دبي , يعطونك أياه بلاش , واستاجر شقه وتنقل بمشاوير التكاسي بين مولاتها وأهمها مول دبي اللي ملاصق لبرج دبي ونافورة بحيرة دبي (يعني تضرب ثلاثه عصافير بحجر واحد), ومشي عيالك على ملاعب أطفالها وكبارها المائيه وغير المائيه , وتراك تبي تشوف فيها الشرق والغرب مجتمعين في مكان واحد , هونق كونق , سنغافوره , منهاتن نيويورك , تشنقهاي وغيرها ..
أما سريلانكا فمحدثك من هواة الطبيعه البريه ولا يحب البحر , ورأيي أنك أذا وصلت مطار كولمبوا أستاجر من المطار فان كبير ونظيف ومكيف بحدود ما يعادل أربعين دولار اليوم , وعلى السايق أكله وشربه وسكنه ومصاريف السياره من وقود والا غيره كلها داخله فيها , وعلى أولك من مطار كولمبو لكاندي , بيت فيها وتمشى على ألأماكن السياحيه فيها , وبعدها بكم يوم توجه لنورليا واسكن فيها وتمتع ببرادها وجمال طبيعتها ومر على ألأماكن السياحيه فيها .وأن بغيت غيرها من المدن السياحيه , فيه مدينتين والا ثلاث غيرها أنا ما رحت لها بس قريت عنها.
أما أماكن تسلية ألأطفال فهي موجوده لكني ما شفتها ولا رحت لها لأن ما معي في سفراتي ألا الرويعي وابن ابي محمد ولا أنا مستعد أوديهم ملاهي ألأطفال , وأن كان أنجليزيتك تخارجك فأغلب الشعب السريلانكي يتحدث الأنجليزيه , وأن كنت ما تحدثها حاول أن سواقك يتكلم ولو شوية عربي ..
أغلب الفنادق , عندهم أسماء وخرايط لكل مكان سياحي , والسواقين خبرا فيها والبلد آمن وهذا الوقت (الصيف) تكون الفنادق رخيصه لأنه وقت يقل فيه السياح والطبيعه تظل جميله جدا لكنها ما تقارن بحال من ألأحوال بوقت الذروه اللي يقابله الشتا عندنا ..
التكاليف , لكل حجره أجره , لكنها أن ما كانت أرخص من ما عندنا بكثير فهي ما تزيد عليها ..
ألأكل في سريلانكا غالبا ما يجي على هواك , وأن كنت من المدمنين على الكبسات والقدوع والقهوه فخذ معك معاميلها وطلباتها وقدر ضغطها , أما محدثك فلا لي صبر على الطبخ لا أنا ولا بقية أعضاء الوفد , وكل ألأسفار اللي سافرتها آكل من ألأكل اللي ألقاه عند أهل البلد , ما عدا السفرات اللي خاواني فيها المخاوي فهذي كان المخاوي هو طباخها وغسال مواعينها , وأنا أكالها بالأضافه للأماره ومسك صندوق الرحله , وكثر الله خيري اللي تحملتها وتحملت أخوة المخاوي معها...