[منقاش]

دايم قبل تبدي رايك في أي قضيه أسأل السؤال المنطقي .
من المستفيد ؟.
بالنسبه لساهر , واحد من المستفيدين نعرفه , وهو أنا وأنت والثاني والثالث والحيوانات السايبه وغيرها, لأن حوادث السرعه راح بسببها أبرياء كثيرين , وأفنت أنفس واجد وعوقت ناس واجد ويتمت أيتام كثيرين , ورملت نساء كثيرات والكيل طفح , والمسرعين يستاهلون اللي يجيهم وليت ظهورهم تضرب قبل جيوبهم حتى ينخمون ابليس , ويكفون أنفسهم ويكفون الناس شرهم ..
والمستفيد الثاني هم الملاك لساهر اللي ألى هاللحظه ما أعرفهم بالضبط , ولا أدري عن هذا الغير كامل هو كم يمتلك منها ؟ , ولا أدري هو واجهه لمن ؟, وأنصحكم لا تقولونه أذا تعرفونه حتى لا تدخلون أنفسكم في أشكالات أنتم بغنى عنها .
لكني أرجح أن المشروع حق أريد به باطل , يعني بعباره ثانيه :
صلى المصلي لأمر كان يقصده @@ فلما أنقضى ألأمر لا صلى ولا صام ..
وهالمستفيدين أقلقوا راحتنا وضيقوا صدورنا وسببوا لنا السهر والأرق قبل نعرف ساهر , ووصل بهم الجشع حتى مستوى الحماله في حلقة الخضره بعد جابوا شركات ما أدري هي لمن ؟, وجابوا عماله أجنبيه زاحموا بها أفقر الفقراء في لقمة عيشهم وحرفه من أدنى الحرف أسمها الحماله , ولا أستبعد أنهم يوم شافوا قطاع حمالين حلقة الخضار يحتاج الى تقنيات وتكنلوجيا عاليه قرروا يجيبون شركات تعطي العامل عربيه وفرهولين وتاخذ منه مبلغ كبير يوميا والزايد له أن زاد شي حتى يساهمون في تطوير الوطن والموطن تكنلوجيا.
ووصلوا هالمستفيدين للمواقف في المطارات اللي ما بنوها ولا سفلتوها ولا ظللوها ولا خسروا فيها قرش ولا تحتاج لأدارتهم , وكان ألأولى أنها تبقى بلاش طالما أن اللي بناها البلد واللي يبي يقف فيها هو ابن البلد , لكن الجشعين أخذوها وسرنا ندفع لهم مبالغ كبيره ونحنا كرام , وهم كل اللي خسروه ماصورتين على بوابتين وكم عامل وأجهزه , وكلها التكاليف من عماله الى تجهيز ترجع قيمتها وتكاليفها من دخل يوم واحد , والظاهر يبون ياخذون المجاري فيما بعد وهم ما بنوها ولا خسروا فيها , وربما يجي الدور في يوم من ألأيام على المقابر ويصبح وقتها دفنكم اللي باقي تمتعون به بلاش الى هالوقت بفلوس , وكذه يصبح المحظوظ اللي يموت بدري قبل يصبح القبر بفلوس وقبل يحسد الحي الميت على موته ويقول ليتني مكانك ..
ولو لي من ألأمر شي كان دعمت ساهر وخليته يغطي كل الخطوط بما فيها خط بلاد ثماله وبقية الطرق الزراعيه والترابيه بعد وأقول بعد أخصص دخله كله لبناء دور نموذجيه للأيتام بنين وبنات فيها الملاعب الرياضيه ووسايل الترفيه ومرافق التعليم والتدريب , وأن زاد شي أعطيه للفقراء والمشاريع الخيريه .
كذه نبصم بالعشره لساهر ونصفق له بالعشره ونقول لمن يعترض عليه أسكت يا حشره , وبدون هالكلام نبي نظل نون مثل ونين المواتر سته وستين اللي أكثركم سمع بها والقليل منكم أدركها , وسلامتكم ....