رد: بداح في باريس
صحيت يوم الجمعة متأخر قلت هالحين الشيخ ينتظرني ولكني لم اجده بالفندق وجلست انتظره لين جت الساعه 11 عندما رجع وزقرني وينك يالبوذي قلت راحت علي نومه الا انت وين رحت قال بالمترو اقولك وهالحين ابي اتوضاء وانزل 0
نزل وبيده الخريطة قلت هالحين لازم تصلي انا سمعت منقاش يقول اذا الرجال مسافر او مجنون مافيه واجب الصلاة قال الشيخ هذا منقاش اذا سافر يخلي عقله ببيت الشعر الي في بيته
سال الفرنسية عن الموقع وركبنا المترو وقلت له وين رحت قال انا لفت نظري هالسنه ان الشوارع مليانه سياكل كلها شكل واحد ومرصوصة رص ممتاز ومقفله وسالت سائق التكسي الاسباني(له 30 سنه في فرنسا) اللي ركبت معه قال الحكومة الفرنسيه امنت السياكل واي واحد من الناس يقدر يحط 50 سنت وينفتح القفل ويستخدم السيكل والمكان اللي ياصل له يوقفه ويقفله والحكومه تفكر السنه الجايه يحطون دبابات للتخلص من الزحمات والتلوث وزيادة اللياقة
ثم التفت علي وقال ياكثر الاشياء الزينه عندهم
نزلنا من المترو واتجهنا الى مسجد باريس الكبير وهو مسجد كبير 0
عندما ركبنا المترو عائدين الى الفندق قلت من بنى المسجد الملك فهد ؟ قال لا هالمسجد تم انشائة عام 1926، من ميزانية الدولة الفرنسية وافتتح المسجد الرئيس الفرنسي أنذاك "دومارغ" .ويعتبر مسجد باريس أول معلم إسلامي تكفلت الدولة الفرنسية ببنائه، إذ بدأت الأشغال به سنة 1922 مباشرة بعد حرب «فيروان» سنة 1916 والتي توفي فيها حوالي 28 ألف مسلم دفاعا عن فرنسا. وجاء بناء المسجد الذي يقع بالمقاطعة الخامسة من باريس، كامتنان وعرفان من الدولة الفرنسية للضحايا المسلمين، الذين حاربوا إلى جانب فرنسا.
والحقيقة ان المسجد يعتبر نقطة ارتكاز مهمة لهوية أكثر من عشرة ملايين مسلم ممن يشكلون العدد التقريبي لمسلمي فرنسا، حيث يمثل الإسلام ثاني أكبر ديانة سماوية فيها.كما أن المسجد يمثل أول صرح إسلامي يتم تشييده بناء على قرار من حكومة أوروبية علمانية بعد الحرب
وقد اعلن الامام قبل شوي البدء بمشروع تغطية الساحة الوسطى وافتتاح مطعم خيري طيلة فترة الشتاء
قلت ياشيخ طلبتك قال عطيتك قلت ابي اتقهوا بالفويكيت علشان اصور واوريها البنيخي بسريلانكا قال مانت بصيط بالبوذي تبي تجخ ؟ 0
دخلنا القهوة وقال نبي نصير على الطرف علشان نتفرج على الرايح والجاي واغدي احد يشوفني من المعارف ويحكي وترنا نبي نحلل القريشات نبي نطول 0
قلت ياشيخ انت لاحظت ان الفرنسيين نحاف ماقد شفنا سمين لا حريم ولا رجال ؟ قال الله والعالم ان الدود لا عبن بهم وهم ماهم دارين وصدقني يابدوح اذا شفت السمين لو تقصقص اصله لقيته عربي
طال المقام ووضع الشيخ راسه على الطاوله ونام فقلت خله (يدفق النعاس) وهو اصطلاح يطلقه الشيخ على القيلوله
وفجأة نهض وهو يتعوذ قلت خير قال حلمت قلت وشو فيه قال بعدين اقول لك يالله قم
|