أنا وجرح البعد والشوق والليل
والصمت واحساس الغلا والمعاناه
البوح يرسمنا بصدر المراسيل
أدنى الخيال ومبتدى الصدق وأقصاه
والناي يعزفنا بصوت المواويل
فيض الحنين وصادق الشوق معناه
ياما أنتظرتك يحترق فيني الويل
مع طيفك اللي علّق اليأس رجواه
ياما سرت بي يمك أحلا التعاليل
وتالي شقاي يردني صوب مبداه
ياما تشربتك نفس نكهته هيل
ياغلا أمنياتي واول العمر واتلاه
ياما نزف ظلك أطعون العواذيل
ياحلمي اللي ماتمنيت فرقاه
جيتك وفا وأسرج لك من الوفا خيل
قلبي لهيب الشوق من يمك اعياه
وجاك الغلا ينزف تعب مجُهد الحيل
بآخر حدود اليأس واقفت بك خطاه
وأنا دخيل مصافحك مابقى ليل
للصمت وأحساس الغلا والمعاناه