[حسن عابد]

النعيريه


الديره اللي ياعـل السيـل يسقيهـا
وشلـون ماحبهـا واحـب طاريهـا

احبها حـب ساكـن داخـل اعماقـي
ومهما يجور الزمن مانيـب ناسيهـا

فيها ربيت وعرفت ان الغـلا فطـره
واحبها من صميـم القلـب واغليهـا

من عادني فـي صفـوف الابتدائيـه
ومن عادني العـب الكـوره بناديهـا

الين قدنـي كبيـر وفاهـم وعاقـل
واكتـب قصايـد تشرفنـي معانيهـا

تصدق اني لو اجيها وانـا مغمـض
ادل حتـى شوارعـهـا وكبريـهـا

واسوق روحي لها من شان عمدتهـا
واحبهـا مـن محافظهـا لشرطيهـا

ديرة هل العرف والوقفات والفزعـه
. فيها القبايل تفاخر فـي عزاويهـا

الله جمعهم على العز وعلى الطاعـه
صاروا على قلب واحد وسكنوا فيهـا

الديـره اللـي لهـا فقلوبنـا موقـع
نعيش فيها وندفـن فـي اراضيهـا

فيها الحضاره وفيهـا العلـم متقـدم
غطـت خدماتهـا علـى ضواحيهـا

اشياء واجـد تبيـن لـك تطورهـا
واكبر دليـل التطـور فـي مبانيهـا

صارت عروس الربيع ومقصد السايح
الناس من كل حدب وصـوب تاتيهـا

اذا سألـت اي واحـد وينـك مخيـم
تلقى خيامـه ورى الديـره مبنيهـا

خدمه وفرقـة دفـاع ورقـم مجانـي
من كثر ميزاتهـا ماعـاد نحصيهـا

شعارها(ربعـوا معـنـا) وحيـاكـم
الله يرحـب بـهـا والله يحييـهـا

تلقى بها العشب بشكالـه وبنواعـه
امـا نبـت وسطهـا ولا حواليـهـا

وتلقى بها الحمض والحوذان والربله
وانواع واجـد ماتحظرنـي اساميهـا

وتلقى بيوت الشعر والكيـف والفلـه
وتلقى بها الذود ترتع فـي مفاليهـا

وتلقى بها كل شـيٍ يبهـج الخاطـر
ان قلـت ياحليلـهـا ولا يالبيـهـا

الله عليها من اولهـا الـى اخرهـا
والله من عيون بعض الناس يحميهـا

ويالله عسى مزنة الرعـاد والبـارق
تملـى ملازيمهـا وتملـى محاجيهـا

واللي ماركز معي في مبتدى القصـه
فل يستمـع زبـدة القصـه بتاليهـا

انـا ترانـي مابالـغ فـي محبتهـا
وشلون ماحبها وامـي وابـي فيهـا

هذي قصيده علـى شـان النعيريـه
تقديـر لمحافـظ الديـره واهاليهـا