(( فنجــــــــــــــــــــــال ))
هــات الحـطـب نـويـت لــي نـيـه ### نـيـة شــرف ماهـيـب عوجـانـيـه
هات الحطب ثم شق له يامحمـد ### شقاً في الارض بطـول بـاع بنيـه
وبعـرض بـاع اللـي ذراعـه وافـي ### شيـخ السـرَب متحيـزم الجنبـيـه
والسمـر حـط مــن أولــه ثنتيـنـه ### وثنتـيـن واقـبـس نــار عــزً حـيـه
حتـى السنـا يقـدح ونـاره تشعـم ### تـقــول نـــار الـضـفــة الـغـربـيـة
واليا كلـت نصـف الحطـب او ثلثـه ### عزبـتـك جبـهـا وابـسـط الـزولـيـة
ونــزل معامـيـل الـرجـال ونـجـرك ### كبـه لاقـع يصيـر وسـطـه شـيـه
والهـيـل دنـــه والـعـويـدي دنـــه ### وبـيــدك قـــرب كـيـسـة الـبـريـة
وبراح كفك حـط فـي المحماسـه ### حفنه من اللي من عدن مشريـه
وضعيـف حـب البـن طشـه بــرى ### افـرز جمـر واقلـط علـيـه شـويـه
وحــرك كـبـار الـبــن بالملـقـامـه ### ملقامـة سـوداء تـقـول مشـويـة
واحمـس حبـوب الـبـن لاتحرقـهـا ### واحذر يجي في الحـب حبـة نيـه
وانصـب مـاه وبـش كــل عرقـتـه ### الـحـبــه الــهــا يــاولــد مــاريـــه
لاهيب لاسـوداء ولا هـي خضـراء ### ولاهــيــب لاشــقــراء ولا بـنـيــه
والـى بـرد حــب الـزيـود وبــردت ### محمـاسـة مــع طـولـهـا مثـنـيـه
القـرش حـلـه عــن نــواة الحـبـه ### حتى تجي مثـل الحصـى مبريـه
وصـبــه بـنـجـر ماتـخـالـف يــــده ### ولاهيـب فـي وقـت اللـزوم يديـه
ودقــه ودقـــه باليـمـيـن ودقـــه ### وحـرك طحـيـن اجــزاءه التحتـيـه
وان كــان ماتـعـرف لـدقـه وزنـــه ### مـن صفـر عـد الـيـن حــد المـيـه
ثـم اغسـل ابريـق الطبـخ بالميـه ### ثم صب وسطـه مـن زلال الميـه
واركـه علـى جمـرً تـزايـد صـلـوه ### وابعد عن الماء الجمـره المطفيـه
ورومس وغـن ولال كانـك شاعـر ### وان كـان مانتـه مـن هـل الـرديـه
عـوذ مـن الشيطـان واذكـر ربــك ### ترى النصيحه في الزمن مشريـه
والى دفا الماء صب مافي نجرك ### صبـة لـواري الرمـل فـي القـديـه
واغط الابريق بغطوته وافطن لـه ### وافـطـن بـعـد للخلـطـه السـريـه
واسبـر وعايـن ليـن ياخـذ فـوحـه ### وفـوحـه وفـوحـه ثالـثـه مغـلـيـه
والـهـيـل دقـــه مـرتـيـن ومــــره ### وصـبـه بـوسـط الـدلـه المـركـيـه
ثــم صــب بــنً طابـخـه بابريـقـك ### صبـت سوانـي مـن بطـن ركـيـه
وحـط العويـدي بيـن اصابـع يــدك ### ان كـان تبـغـى القـهـوَه عويـديـه
والـى اونسـت دلتـك نـار وجمـره ### والشعلـه الـلـي تصـلـى حـدريـه
يبـى يـجـي للهيــل زبــد ورغــوه ### وبينقـلـب مـثـل انـقــلاب الـحـيـه
ولــملم فناجـيـلـك وصـــب لـربـعـك ### من الدلـه اللـي بالذهـب مطليـه
دلـه تعـدل الــراس ولـهـا خـرمـه ### ومــحلله مــن لـجـنـة شـرعـيـه
هذي سلوم اهل القيم والشيمـه ### اهـل الـكـرم والطـيـب والجاهـيـه
خل قهوة راعـي الدجـاج التركـي ### الـلـي يسـمـي قـهـوتـه تـركـيـه
يـحـط مـــاء فـالـكـاس ويـبـردهـا ### ويبيعـهـا فــي الـسـوق بالـربـيـه
وقـــتً يــــدور وتــــدرج رحــاتــه ### والشمس صارت فيه مثـل الفيـه
راحـوا هـل المعـام واهـل اللحيـه ### وجونـا هـل الطربـوش والطاقـيـه
اهل المراقص والطرب والدسكـو ### بــرق العـيـون متعـبـيـن الهـيـئـه
لاجاك واحدهم بوسـط المجلـس ### كـنــه وزيـــر الـنـفــط والـمـالـيـة
واليا طلع لـو شـاف زول الجـرذيى ### يـصـيـح كـــن مـعـانـقـه جـنـيــه
اللـيـل كـلـه يـــدرج مـــع ربـعــه ### مثـل الـكـلاب الـلـي تــدور البـيـه
واليـا أصبـح الصبـاح واقبـل نــوره ### مـن قــو بـاسـه صـبـح البوفـيـه
عطنا صحـن كبـده وببسـي بـارد ### واثـنـيـن يـابــن الـنـيـل كمـونـيـة
هـات الحطـب نويـت ليـلـي نـيـة ### نـيـة شــرف ماهـيـب عوجـانـيـه
هـات الحطـب نويـت كانـك منهـم ### أحـط فـي علـبـاك وســم وكـيـه
( سعود الحافي العتيبي )