[سهيل2012]

قال ابي اسولف عليك خايف عليك من النوم قلت له سولف بارك الله فيك وبدأ سالفته عن العربان والحروب والغزو وعلاقات بين ابن الشيخ الفلاني وصديق والده

ما شاء الله عليك يا أخي الحاج سلام .. وها المداخلة الرائعة الذكية ..

وعلى طاري السوالف والسولفجيه .. سافرت قبل عدة سنوات في رحلة خليجية سياحية مع

ثلاثة من جماعة الربع .. منهم واحد ٍ سولفجي .. والخطوط طوال - كما تعرفون - وبدا صاحبنا في سوالفه .. الطوال اللي بعضها تبدأ من مدينة ولا تنتهي إلا في الثانيه ..
مالنا في طوالها .. أخذنا في قطر يومين ، وفي البحرين ساعتين ، وعشرة أيام في دبي وما جاورها .. وذاك اليوم قالوا جماعة الربع : نبي نزرق لعُمان .. نأخذ يومين .. وبتـّّلنا .. على مدينة العين الأماراتية .. ومنها دخلنا عُمان .. ( حتى أذكر أيامها مواطني الدولتين يدخلون يالبطاقة ) .. ما أدري وش قصتهم ؟
دخلنا عمان .. صباح يوم جمعة .. والمسافة تزيد على 400كم .. مع هاك الخط الدغري المجلعد اللي كني أطالع فيه ذلحين .. ومابه إشارات .. إذا وصلت التقاطع تجد دوار .. وهكذا ..دوارات كبار ..
وصلنا إلى مسقط ( ياربي لك الحمد ) .. وقلنا وين طريق صلالة .. نباها .. ولكن صدمنا بالمسافة 1200 كم .. وجبال بعد !
أقمنا في فندق - للأسف - متهالك في مسقط .. وفي الليل أخذنا عشانا ورحنا لحديقة كبيرة جدا .. حلوه لكن نكدوا علينا بالأغاني .. يا حبّهم فيها حبها خاصة أغاني أبو نورة ! شي ما هو معقول !

رجعنا الفندق وبتنا .. وشوي ورى صاحبنا السولفجي ما منه .. ندوره .. يمين يسار ماله أثر ..
أثره قد نزل ( للدور الأرضي) وأنتم أكيد تعرفون وش في الدور الأرضي !
شوي وهو طالع زعلان متنكد خبثان خاطره .. سلامات .. ولاه يسب ويسخط .. نزلنا أنا وحدا الربع تحت .. نبي نشوف وش جا على صاحبنا .. وسألنا واحد خليجي ..
قال صاحبكم السعودي .. هذا دخل هنا وجلس جنب واحد ( معطيها ) وقعد يسولف معه !
وشوي اشتغلت البُنيات والركب !!
سألنا :أنتم مضرينه بالسواليف ؟
قلنا : لا والله مضرينه بالتبن .. ! أكرمكم الله ..
بتنا مبات القشر ويوم أصبح الصبح ونحنْ نخرج من فندق بقعا .. ويوم نزلنا تحت في المواقف قدام الفندق والبلوش يجون لهم 50 رجال سألنا واحد : العرب ذولا وش هم ؟
قال عرب .. ذولا بلوش حطتهم السفينة دوبها اليوم .. قلنا وش يتحرون ؟
قال :( الجنسية )جايتهم بعد شوي يأخذونها ويصيرون مواطنين عمانيين !!
نكفنا معودين مع دربنا .. وخوينا أبو سوالف ( خبيث ٍ خاطره ) .. ويوم وصلنا مركز الجوازات اللي يشرف على مدينة العين .. وخوينا يبدأ ينشرح باله .. تعدينا المركز .. ودخلنا مدينة العين الاماراتية .. وصاحبنا أبو سوالف يتهيض :

(( بلادي وإن جارت عليّ عزيزة ٌ * وأهلـــي وإن ضنـّــوا عليّ كرامُ ))

قلنا له : ياخبل حنا في الامارات ما بعد دخلنا حدود السعودية !!!