[منقاش]

رد: "اللحوم الحمراء" للطبقة الثرية فقط !! رد: "اللحوم الحمراء" للطبقة الثرية فقط !! رد: "اللحوم الحمراء" للطبقة الثرية فقط !! رد: "اللحوم الحمراء" للطبقة الثرية فقط !! رد: "اللحوم الحمراء" للطبقة الثرية فقط !!

الله المستعان عليك يا مراسلنا , وانا من اللي قاطعوك لأنك تطرح احيانا تساؤلات عن مواضيع شايكه وخصوصا في منتدى النقاشات , وتسأل عن حلولها وعن اسبابها اللي ما اظنك جاهل بها ؟ .
بعباره ثانيه , كثير من مواضيعك جوابها معروف , لكن نصف الأجابه اللي في كل مره نلقاكم تدندنون حولها ما تلمس لب المعضله ولا تزيد عن كونها نوع من الدردشه المكتوبه بشي من الحيطه والحذر , يعني نقاش من اجل النقاش يدور في حلقه مفرغه ويحوم حول الحمى ولا يمس لب المعضله , ليه ؟؟, لأن النصف الثاني الغايب من الأجابه انتم مضطرين تجنبونه حتى لا تسببون للمنتدى او لأحد بالأذيه , وانتم في هالحاله محقين واللي قاطعوكم محقين مثلكم ..
طرطعة الصحفين والأعلاميين حول هالموضوع وغيره من المواضيع غايتهم منها في كل مره هو الترزق واكل العيش من حصاد السنتهم , يعني ان مردود عملهم على مجتمعهم يشابه مردود البطاله المقنعه على مجتمعاتها , لأن وزارة الزراعه اللي يلوكون في اسمها لاهي سبب المشكله ولا هي القادره على حلها حتى لو قدمت الأعلاف بلاش لأهل المواشي والدواجن ...
وبدون تقيه سبب المشكله يا سيداتي وسادتي وبنسبه لا تقل عن 99% هو السياسه الماليه لوزارة الماليه , وبالتحديد سياسة ربط الريال بالدولار ..
وحتى تلمون ببعض خلفيات الموضوع ننصحكم بقراية المقابله اللي أجراها ابو نقشه مع حليفه ساري الليل في منتدى الحوار والنقاشات تحت عنوان : ابغي رايكم في مشكلة الفاس والراس ؟؟..
واذا تبون تبحرون اكثر روحوا لمقالات عضو المنتدى المستعين بالله ابو عبدالله اللي كتبها في منتداكم تحت عنوان : ما وراء الأكمه , وهي مجموعه من الحلقات توقف المستعين عن اكمالها من باب الأحتجاج بعد اوقف المشرفين الردود على آلحلقه الخامسه او السادسه (نسيت هالحين) منها ..
وخذوا في حسابكم , الدولار رايح يطيح اكثر واكثر ويطيح معه الريال وتزيد معاناة الناس ويزيد معها الفقر , وهذا يسمونه التضخم اللي ما عرفته البشريه الا بعد استعمال العمله الورقيه بدل الدينار الذهب وريال او درهم الفضه وتضخمت اكثر بعد خدعة سحب غطاء الذهب عن الدولار ..
وصدقوا او لا تصدقون أن عوام الناس قبل خمسين عام كانت اوعى منكم في شئون العمله والنقد , والدليل انه عندما توفي والد المستعين بالله ابو عبدالله رحمه الله واسكنه فسيح جناته عام 1380 هجريه , قام الأقربين بحصر تركة والده بعد ان باعوا حلاله واعطوا الورثه الراشدين حقوقهم وحقوق القصر حولوها لجنيهات ذهب حتى لا تفقد من قيمتها شي مع تقادم الأيام وسلموها لوكيل القصر الشرعي ..
وللعلم , عند وفاة والد المستعين رحمه الله كان سعر الذبيحه الجيده ستين ريال تقريبا واليوم قاربت بالألفين ويستاهل اهل الحلال اكثر من هالسعر , يعني خمسين ريال عام 1380 تعادل اليوم الفين ريال تقريبا , ورواتب الموظفين بتاريخ آخر زياده للرواتب فقدت اكثر من نصف قيمتها أن ما فقدت الثلثين ..
حلول المشكله اللي يراها ابو نقشه :
واحد : العوده الى الله على المستوى الفردي والتخلق باخلاق الأسلام , وعلى المستوى الرسمي فصل الريال عن الدولار وزيادة الرواتب حتى تساوى مع قيمتها الحقيقيه عند آخر زياده , بضربها في 2 او 3 , ووضع زياده سنويه تجبر التضخم ان وجد , واهم شي يبدأون بنا يالمتقاعدين ..
اثنين : انشاء وزاره للزكاه وتعين رويعي الغنم وزيرا لها وتفعيل الزكاه على البترول ومعادن الأرض كلها وبقية ما فوق وما تحت الأرض وانفاقها في مصارفها الصحيحه وفيما امر الله من النفقه على الأيتام وامثال المسكينه اللي سمعناها تبث شكواها وحزنها الى الله , وانا اضمن لكم بعد كذه ما يبقى فقير الا وعنده بيت بحوش كبير يليق ببني البشر وسياره وسايق وخادم ...
ويش رايك يا مراسلنا في كلام الشيخ ابو نقشه ؟؟..