[منقاش]

اخويه الحبيب مراسل ثقيف : نبدأ بالأهم ثم الأقل أهميه ..
والأهم في هذا النقاش هو موضوع الوسام الفضي اللي انا سبق ووجهت المشرفين بترقيتي من الذهبي الذهبي الى الذهبي الفضي , والدليل هذا ابو نقشه شوفه هو الوحيد في المنتدى الحايز على هالوسام رغم انف ابو عبدالرحمن عميل المخاوي اللي كان يتمنى اني ابقى على الوسام الذهبي , ولا غيره الا بعد هددته بتنزيله من الشرافه وتسليمها لأبن ابي محمد , ولا شفع له عندنا الا شفاعات بعض الأخوان من اعيان المنتدى اللي ربما وصلتك علوم شفاعتهم كما وصلت لكثير من الأعضاء..
وكما يقولون , من لا ما يعرف الصقر يشويه ومن لا يعرف الوان الذهب واقيامه يظن الذهب الأصفر أحسن ذهب , ويجهل أن الذهب الأبيض هو اجود واغلا انواع الذهب ومنه يستخرجون الزيبق الأحمر النفيس اللي بسببه قبل كم من سنه وصلت مكينة سنجر الخرده (للخياطه) الى مية الف ريال , ريال ينطح ريال..
بخصوص زيادة ال15% الأخيره , هذي ما عنيتها في ردي لأن التضخم التهمها وتجاوزها بعد 6 اشهر من صدورها , انا اعني الزياده الكبيره اللي قبلها بسنين ...
وخذوا في حسابكم انه لو ضربت امريكا واسرائيل ايران , وردت ايران واغلقت مضيق هرمز كجزء من ردها وتفاعلت على اثر الهجوم تداعيات الحرب , لو حدث هذا الاحتمال من المرجح أن اسعار البترول تبي تقفز وتضاعف قيمتها ومقابلها ينهار الدولار وتنهار اقتصاديات دول كثيره من المستورده للبترول , وريالنا ماله مفر من السقوط مع الدولار بسبب ارتباطه به , ووقتها تشوفون التضخم الحقيقي اذا اشتريت الدجاجه بمية ريال وطبق البيض بخمسين ريال ..
وانا استغرب منك يا مراسلنا الخلوق والطيب ان شاء الله يوم تحدث عن قيمة الريال الشرائيه وكأن الداخل مفصول عن الخارج , وكأنك تجهل ان الريال مربوط بالدولار , يا مراسلنا الدولار من سنين ينزل بأستمرار بنسب متفاوته كما حصل في الماضي والحاضر وينزل بنزوله الريال وهذا الجانب الأكبر من المشكله اللي بمعرفتها أو بالأحرى الأعتراف بها هو اول خطوات الحل ..
وهذا التدرج السنوي في نزول الدولار هو اللي يخلي الكثيرين منا ما يستبينون النصح الا ضحى الغد , لكن الأنهيار الكبير اللي رايح يحس به الناس وبآثاره المدمره والمفاجئه جاي في يوم من ألأيام وجاي معه انهيار كل العملات المرتبطه بالدولار اللي اتمنى يومها اننا نكون قد فصلنا عملتنا عن هالدولار التعيس...
وانا ما اظنك تجهل هذا الشي خصوصا بعد بياناه لكم , لكنك تذر الرماد في العيون وتكتب وفي فمك ماء وقلمك مشبع وغاص بأحبار التقيه , ومع هذا انت في واسع المعذره لو أنك من الأساس ما تطرح مواضيع للنقاش من هالحجم وهالأبعاد اللي ما امامنا تجاهها الا ثلاث خيارات ,اما نقول ما نظن انه هو الحق والحقيقه واللي ربما بسببها تعرض بعضنا لتأويلات المتأولين ووشاة الواشين , او نقاطع موضوعك ونحنا ما نحب مقاطعتك , او نخفي في انفسنا مالا يخفى على الله ونلجأ للتقيه ونخشى الناس والله احق ان نخشاه .
طيب , والنتيجه ويش هي ؟؟, هذا انت طرحت المعضله ولا ترى من حلولها رفع الرواتب وما يلحقها من الضمان الأجتماعي والمكافآت والأعانات الخ, وهذا انت حفظك الله على استحياء تكلم عن الزكاه ومن يجب عليهم اخراجها وتمناها في صغار المعاني وتجاهلها وتقفز عن كبارها ....
وانا اتفهم ظرفك وسبب تحفظك في ردودك , لكني لا اتفهم سبب اختيارك لموضوع الطرح وانت مبيت النيه على التحفظ في ردودك مثل بعض (لا كل) المواضيع اللي سبق وطرحتها واشرت لها في مقدمتك , المواضيع اللي لا انت قادر تقول كل ما تعرفه عنها ولا المتداخلين يرغبون الدخول في متاهاتها , وسلامتك يا مراسلنا ولا تؤاخذ معزك على صراحته معك ومع بقية اخوانك اللي يغلونك ويعتبرونك ركن ركين من اعضاء هذا المنتدى , وانت كذلك...