[صقر الحجاز]

قصيدة ماني مجازيك

ماني مجازيك في صدك وهجرانك

ودعتك الله وتلقى واحد ثاني

اتعبت الاعيان والاقدام من شانك

وانته ولا شي سويته على شاني

فزيتلك يوم قلت اسمك وعنوانك

لو كان ماتنتمي لاسمي وعنواني

ماجيت ادورك والا اطق بيبانك

والا اترجاك مثل فلان وفلاني

انت الذي جيتني واعلنت بلسانك

انك على شوفتي جايع وعطشاني

وصدقت هرجك ومنطوقك من لسانك

واقبلتلك مندفع من كل وجداني

ماكنت افكر يجي في يوم نسيانك

وانساك وانته معاهدني ماتنساني

الابعد ماقريت الكذب فاعيانك

حاولت اواعدك وانسى كل ماكاني

خلاص ماني بمتعني على شانك

ودعتك الله وتلقى واحد ثاني

---

مسيرة بطل

يافالق الصبح يامولج نهارك بليل --- ياجامع الناس في يوم البعث و النشور

عليك كل إتكالي وأنت نعم الوكيل --- يا عالم بالمصير و ماتكن الصدور

يالله يالله تهديني سواء السبيل --- و تعصم لساني عن الزله وعن كل زور

الشعر موقف وحده مثل حد الصقيل --- لو كان كتله من احساس البشر والشعور

ياما رقابي ورقيته براس الطويل --- وياما سبح بي بحور وغصت به في بحور

وانا ليا حان ميقافي قبست الفتيل --- و اوقدت من نار فكري للمسافات نور

واليوم لاهنت ياشعري مايخدم بخيل --- مادام سلحتك الافكار مانت معذور

قدمك من العز مايروي ظما كل جيل --- سوالفه تزرع الامجاد في كل بور

وقدمك لميع الهنادي والقنا والصقيل --- وقدمك من المجد ماترويه كل العصور

مسافته عز ماتنقاس كيلو وميل --- بركانها ماخمد وامجادها ماتبور

ياموكب الشعر وقف واستمع لي قليل --- حتى اني اعطيك للتاريخ رخصة عبور

سيرة بطل ماتغيبها حكاية رحيل --- تبقى بوجه الزمن كالنحت فوق الصخور

ماكانت ارض الجزيرة قبل ذاك الاصيل --- إلاتفكك عقيدة وانحدار ودبور

نهارها كم قتيل وليلها كم قتيل --- جنايزٍ مالهافوق البسيطة قبور

قويهم سلطته تسلب حقوق الذليل --- وشيطانهم ساد والظلم انتشر والفجور

وكلٍ لخصمه من اصناف العداوة يكيل -- وصدورهم من جهلهم فالمعاصي تفور

مال الاْمن شجرةٍ فيها مقر ومقيل --- ولابينهم للمودة في الجزيرة جسور

هذا قبل هيت تخطيها عيون الدليل --- وهذاقبل سطوة القرم العزوم الصبور

النادر اللي على العارض يهيم ويخيل -- من يوم عمره عشر شوره غلب كل شور

من قو باسه صنع ممكن من المستحيل ---- ومن طيب راسه يحل معقدات الامور

زهابه الصدق والاخلاص حمل الصميل ---- وسلاحه الدين والتقوى سلاح الغيور

جمَع شتات القبايل لين صارو فصيل ---- واخوان عقب التناحر والجفا والشرور

وحكم بشرع الكتاب اللي ماغيره بديل --- وعم الفرح فالبلاد وساد كل السرور

لامال ميزان غيره مايحيد ويميل ---- في سطوته ينكسر راس الجهل والغرور

شخصيته مالها في كل جيله مثيل ---- تجف الاقلام وبمدحه تضيق السطور

والله ليبطن ماجابن ناقضات الجديل --- مثله ولااقول في كل النشامى قصور

ويالله يامستجيب للدعاء ياجليل --- من عبدك اللي لك مطيع وذليل وشكور

ترسل على قبر ابو تركي صدوق المخيل-- وسمٍ يساقيه من غر السحاب البكور

وتهل فوقه بسيل مايلاديه سيل ---- وترحم عظامه وتغفر زلته ياغفور

وتجمع به المصطفى في جنتك والخليل --- وتحفظ عياله مواكير الحرار الصقور

وإنك تجمل وتهديني سواء السبيل --- وتعصم لساني عن الزله وعن كل زورٍِِ






الغزل

ياصاحبي واللي خلق نعمة السمع == إنك هنا بين المعاليق ثابت

ماجيتلك صدفة ولاجيتلي رمع == وإن غبت عني فرحتي معك غابت

غيري عبث فالحب بسياسة القمع == لكن لا ودت ولا يوم جابت

إلا محبك من عشق يحسن الجمع == ماشاب حبه لوقوى فيه شابت

والدمع هذا اللي تشوفه مهو دمع == اشعلت عيني لاجل اشوفك وذابت

واللي نزل منها على خدي الشمع == ارقد مدام الشوق فالقلب نابت

---

الحكمة

الحياة افراح واحزان ودروس وعبر === والتجارب صفحة ايامنا وكتابها

مهما زاد الشخص في المال والعز وكبر === وأهدته شهوات نفسه جديد ثيابها

وبرقت له زيف الايام وأغرته وعبر === المصير أرضه يلحف عليه ترابها

والمصايب حملها سم ودواه الصبر === ورحمة الله دون خلقه ماسكر بابها

وعن حياة الآدمي شيمته تبعد شبر == وإن فقد من شيمته شي نفسه عابها

وانقبر في العيب لو ماتوفى وانقبر == والحياة اللي بها نقص مانرضابها