باب الخشب / د. حمد العصيمي
باب الخشب روحوا وانفضت السهرة
راحوا وخلوا بقايا التبغ شبابه
اللي لبس معطفه واعطى السهر ظهره
واللي سرى به نسيم الشوق لاحبابه
والباقي اثنين انا وانته من العشرة
فضفض ترى الليل صحرا هم وذيابه
يا باب انا وانت مقطوعين من شجرة
من شجرة الشعر انا وانته من الغابـه
شف كم سنة وانت واقف تحرس الحجره
وانا على كل بيت من الشعر بابـه!
ضحيت با الغابه وبا الما وبا الخضره
وضحى حمد لا جل بيت الشعر باعصابه!
ياالشامخ اللي عطى فاس الحطب عمره
وطول الزمن ما عبس في وجه حطابه
يا كبر صبرك وذنب الفاس يا كبره
اللي قطع عودك اللين من ترابـه!
ايوب يمكن عطاك شوي من صبره
لكن لي ما عطى صبره وجلبـابه
تصفق بك الريح لا مرتك منتثرة
وتضحك لها درفتينك ناي وربـابــه!
يا كثر ما خلفك من اسرار مندثره
اقلها رمية الانســـان بثيابـــــــه!
يا باب ابقفلك واحفظ باقي العشرة
لو شجرة الشعر خانت شجرة الغاــه