بــــــــــــندر ســـــــــــــــرور
يامل قلـــــــب تله الـــــــود تلــي=تل الرشاء من فوق ملحا جلالـــــه
في غربها تسعين شق ومشــلي=تجفل ليا سمعت ضريس المحالــــه
من واحد"طـــرق عليه يهـــــلي=ألحق بواقي القلب مع ماجرى لـــه
يطرق برمش" للمحـــاجر مظــلي=ظافي على بيض المحاجر ظلالــه
هرجه لبن بكــــر"ردوم متـــــلي=مابينت فيها رسوم الشمــــــــالــــه
يابنت خلي واحد" مايصــــــــــلي=تارك عمود الدين مالك ومـــــالــه
خلي ملعــــن والدينـــــك يـــــولي=تلقين في نجد المســــــمى بدالـــه
حتى أيش لويفرش لك البيت زلي=من لايخاف الله حرام حـــــــلالـــــه
عليك باللي للجماعه يهـــــــــــلي=اللي كما النثله منارة دلالــــــــــــه
في الرجل ثنتين"حداهن تــــــدلي=من كبهن ماهوب ويا الرجــــــــاله
ليا صار مابه دين مع زين دلــي=جعله من الدنيا تقطع حبــــــــــــــاله
======================================
وله أيضا
يا كثر يافيحان صبر" صبرنــاه= أمس الشهر عديت باقي سبوعه
لاتغبط اللي صار زوده بدنيــــاه=يتبع هوى نفسه وغير طبــــــوعه
مخط"طريق الحق غاد"بعمياه=يجمع وسخ مال"زوال"نفوعـــــه
أغبط تقي صار زوده بتـــــقواه=عبد"لصوت الحق يرخي سموعه
يفرح بصوت منادي الحق ناداه=عجل على المسجد بطي"ركوعـــه
وألا ترى الدنيا حدود" مسمـاه=لابد مايقفي وتقفي زروعــــــــــــه
=========================================
وله أيضا
ياسهيف الذرعان مافي وسواس=لي حاجة بالعرش وأسعى وراها
وأسجد لقادرها على غفلة الناس=وأسأله الجنــــــــــه يكمل عطاها
أسعى ورى حد مهــــاويه دراس=زيزوم نمرا" قادها ماتـــــــــــلاها
علق حبالي فرخ واليوم قرناس=واللي بحالي للولي مشتـــــــــــكاها
أعوذ بك يارب من سعي الافلاس=وأنته رقيب النفس تعلم خفــــــــاها
يابنت أنا هذي شفاياي يــــباس=أطابق الوجبات ما أشفق عــــــلاها
ماني وانا بندر بتباع الانـجاس=اللي قريب" تفلها من لحـــــــــــــــاها
انا بدرب الصيرمي عدم الاجناس=زعيم روق اليا تنصت عــــــــــداها
==============================================