نصائح وعبر نصائح وعبر نصائح وعبر نصائح وعبر نصائح وعبر
[poem="type=0 font="bold medium tahoma, verdana, arial, helvetica, sans-serif""]أبدع جديد الكلام اللي وزنته بالموازين =من شاعر إليا مشى في درب ما يغوى مساره
تسمعوا في كلامي يا الرياجيل ا لموامين= ما كل تاجر يقول إني من أصحاب التجارة
وزعت بين الرجال حقوقهم حسب القوانين= الكل منهم نصيبه يستعده في نهاره
البعض منهم رضي والبعض الآخر غير راضين =واللي بعد ما رضي يضرب براسه في الجداره
وبعض الرياجيل قدامي في وجهه شيء من اللين =وبعض الرياجيل وجهه ما يبشر بالبشارة
وبعض الرياجيل قدامي في وجهه شيء من الدين= وبعض الرياجيل قدامي على وجهه قتاره
وبعض الرياجيل في الميقاف يسوى له ملايين =وبعض الرياجيل في الميقاف ما يسوى حماره
وبعض الرياجيل ماله يرفعه مثل الجناحين= وإليا جلس في مجالس قوم دايم في الصدارة
يصهل صهيل الحصان ولا تحصل له براهين= أقولها من عجب والحر تكفيه الإشارة
وبعض الرياجيل ما يحزم حزامه لو بسكين =يسرح ويضوي مع العالم كما ثور الإثارة
وبعض الرياجيل قدام المره في البيت مسكين= وإليا حضر في الدوام تقول مندوب الوزارة
وبعض الرياجيل يفخر باللبوس اللي مزايين= وإن جاه مسكين ما يعطيه من ناره شراره
وبعض الرياجيل مثل السيف بيدين السلاطين= كلن يشوفه وكلن يعرفه بدو وحضارة
وبعض الرياجيل مثل الزير مصنوعه من الطين= وإليا انكسر بار ما ينفعك في كسره جباره
وبعض الرياجيل ما تعرف عنه شينٍ ولا زين= خلك لحالك وخله في حلاه وفي مراره
وبعض الرياجيل إلا منه وصل في العمر ستين= ما شانه إلا من المسجد ليا باب العماره
وبعض الرياجيل إلا منه وصل سن الثلاثين= ما شانه إلا من الغرفة ليا باب الغماره
وبعض الرياجيل إلا سمع الأذان يغمض العين= ويقفل الباب بالمفتاح ويولع سجارة
وبعض الرياجيل في نحره مخابي للشياطين= يسرح ويمرح مع العربان ما تعرف قراره
إن جيت له من يسار يصد عنك ويرجع يمين= وإن جيت له من يمين يزيد يرجع في يساره
وإن جيت له عند باب البيت تزهم قال لك مين= لا صب دله ولا دق النجر في جوف داره
هذي مزايا كثير الناس حتى في آخر الصين= اللاش ما ينمدح والمدح في مثله خسارة
عندي نصيحه لكم يا أهل العقول في حال ثنتين =حق القرابة وحق الجار في تقدير جاره
وعندي نصيحة يا أبو عينين لا ترمز لأبو عين =يرمز لك بعينه العوراء وتعور من عواره
خلك مع الناس يا ابن الناس وانظر للموالين= وخلك مع الوقت ما بين البروده والحراره
وإليا غلبك الزمان اطلب كريم الوجه ويعين =يعينك الله على شدة زمانك وإنهياره
وأنصحك لا تتبع المقفي ولا تقرب من الشين= الشين لا تقربه وانفض ثيابك من غباره
لا تتبع إلا رجال الدين وصفوف المصلين= هذي نصيحة سوات النقر في صم الحجارة
هذا الكلام الثمين مثمنه عندي بتثمين= أبني بيوت الشعر وأخذت لي منها عبارة
أختم كلامي بذكر الله في عمَّ وياسين= عداد ما لبوا الحجاج في يوم الحداره[/poem]