ياللي بسطت الارض تحت السموات
ياللي القضا في يدك زينـه وشينـه
يامن لوجهك ننحني كـل الاوقـات
وكتبت رزق الادمـي فـي جبينـه
ترحم سليل المجد رجـل المهمـات
اللي رفع شان العرب فـي سنينـه
اللي رسم تاريخ فخـر وبطـولات
وعـز وحمـاس كننـا عايشيـنـه
هذاك (( فيصل)) لاتداعو بالاصوات
تقدم علـى كـل المراجـل يمينـه
وقالوا ان فيصل مات واقول مامات
من شاف خالد شاف فيصـل بعينـه
نفس الشجاعه والنظر والطموحـات
متـورث ٍ عزمـه وحزمـه ولينـه
ياخالد الفيصـل لاشفنـاك بالـذات
كـن المليـك الفيصلـي شايفيـنـه
يامير لك في شدة الوقـت وقفـات
تاطا علـى وجـه العـدو وتهينـه
يامير لك في ميلـة الوقـت مـدات
تقضـي مطاليـب الفقيـر وتعينـه
ياميـر ياميـر الشيـم والمـروات
المجد ماحـدٍ حـال بينـك وبينـه
عن مدتك تقصر يديـن ٍ طويـلات
من طاولك يفشـل وتقصـر يدينـه
وامارتك مارت جميـع الامـارات
وصارت تفاخربـك مدينـه مدينـه
عروسـة ٍ كسيتـهـا بالجنيـهـات
وراحت تمخطر بالرضا والسكينـه
وشاعر ورائد فكر ومنيـن ماجـات
تشيلهـا شيـل البـحـر للسفيـنـه
شخصية ٍ تحكي بها كـل الامـات
يكفيك شر اهل الحسـد والضغينـه
تزهابك حروف الشعر والعبـارات
هـذا الصحيـح وكلنـا خابريـنـه
والشاعر اللي ماصخر فيك الابيات
ماعاد ابي شعـره ودينـي ودينـه
واقبل يابو بنـدر سـلام وتحيـات
ومشاعر ٍ هاضـت وكانـت دفينـه
ومن قال فيصل مات تـراه مامـات
من شاف فعلك شاف فيصل ابعينـه