[منقاش]

طيب هات باقي السالفه يبو بندر ؟, رد وقال :
هاك اليوم , قبل حوالي سنتين , ناداني واحد من عيال عمي , وقال أفزع , هنه داب كنه ثعبان في واحد من الحيشان , يقول , يوم طليت ألا وهي أم حوه اللي أعرفها من يوم أنا ورع بلونها وصقلتها وخفة حركتها .
ويواصل ابو بندر ويقول : بعد أبتدت ترقى في واحد من الجدران , سددت عليها ببندق حاطها عندي , وبعد الضغطه على الزناد هوت من جدارها في سابع موته .
طيب , وصف لنا لونها وشكلها وطولها يا قتال القتلاء على قول المصاريه ؟, وكيف نفرق بينها وبين الكوبرا وبقية الثعابين ؟.
رد وقال :
أولا , لون ألأمحوه من راسها الى آخر ذنبها لون واحد , وهو اللون اللي كنا نسميه الذهبي , أيام المكر والحرير يوم الناس تخيط ثيابها بأيديها , ويخلط اللون الذهبي أذا دققت فيه من قرب , نقط بنيه باهته أصغر من حب السمسم , واللون الذهبي صاقل ولامع ما تخطي العين صقلته ولمعته , وانتبهوا ترونه ماهو اللون الذهبي المترجم من ألأجنبيه للعربيه , لأن ذهبينا كان بين الصفار والحمار .

ثانيا , راس ألأمحوه أنسيابي وروس الثعابين فيها شوية عرض ونتؤات , تماما , مثل يوم راس ألأسود العفن أنسيابي , وراس الصل ألأسود عريض .

ثالثا , ألأمحوه أنحف من الثعبان , وجلدها أنعم , ولا يظهر عليه الصدف الظاهر بوضوح على جلود الثعابين .

رابعا , كان طول ألأمحوه القتيله , أزود من المتر والنصف , وأقل من المترين , لأني رفعتها من ذنبها بيميني وانا واقف وقرب طولها بطولي ..

رد أبو نقشه على أبو بندر وقال : والله هذي علوم ما تسرني , لأني كنت أتمنى أن ألأمحوه تكون نوع من أنواع ثعابين الكوبرا العربيه .
رد أبو بندر وقال بلهجة الواثق : بأذن الله أني أجيبها لك حيه في هذا الصيف , بعد أمسكها بأي حيله من الحيل , لأنها كثيره في وادينا , وتظهر علينا في الصيف بكثره خصوصا جهة أحواش الدواجن .
شكرته , وبشرته بما يسره أن جاب لي ألأمحوه حيه , بشرته أني بالأشتراك معه رايحين نقلع نيبانها , ونسجلها في سجلات العالم بأسامينا ألأثنين حتى ندخل تاريخ الحياه الفطريه من بيبان ألأمحوات , وقبلها نوثق كشفنا بتصوير طيرانها من على سطح بيتي في أم العراد على أربع أو خمس يوتيوبات ننشرها على شبكة النت , بأذن اللي عينه ما تنام .
هذا آخر أنباء ألأمحوه , وادعوا لي ولأبو بندر بالنجاح في هذا المشروع , وسلامتكم ....