[منقاش]

سلام ياربعي , مرضويه , ومرتضين , والمعذره , تروني ما دريت عن الفتنه اللي شبت بينكم الا قبل قليل بعد جاني مشرفنا العام الى حد بيتي ومعه أربعه كراتين عنب وسته كراتين رمان , يزعم أنه يبيها هديه لأبو نقشه والرويعي اللي وقتها حاضر معنا , وكان وهو يدني في الكراتين يردد في الحديث تهادوا تحابوا .
وبعد حط الهديه بين أدينا , جاب علم الخلاف بينه وبين الشيخ سلام , وجاب باقي الكلام وطلب التحكيم .
عودت ألتفت يمه وقلت له , ياولد , خذ خذ هديتك وروح عن العرعره في السعه , وثاني مره أذا بغيت علومك تمشي كبر الجغمه والا لا تبدي , لأن هديتك هذي ما تحملني أظلم ذمتي ؟؟ .
أما الرويعي الله ربنا وربه فهو ما كود يسمع رفضي للرشوه ألا وهو آخذ هديتي على هديته ومعطي الباب بعد بشر ابو عبدالرحمن باللي يسره , هذي ألأوله ..
والثانيه , بالله عليك يا مشرفنا العام , هذا وقت معايده والا وقت مشاده ومناكفه ؟؟. نسأل الله لنا ولكم الهدايه .
الثالثه , شجرة الضرو نفضيه من شجاري الجبال البارده , تنفض ورقها في الشتا وتكتسي بأحلا الحلل مع حلول الربيع , والشجره اللي جات بسببها الفتنه تهاميه حسب ما قال التهامي شيخ التهمان حليفي ابن همام .
وليتك يا مشرفنا العام بينت لنا زمان التصوير كما بينت مكانه حتى تستكمل بيانه , وليتك زودتنا بصور مقربه للورقه والثمره والزهره وساق الشجره حتى تهون علينا البحث وتوفر لنا الوقت وتفكنا من الفتنه .
الرابعه , حليفي الدكتور قشاش وصف في معجمه أوراق الضر و وقارن بينها وبين أوراق البطم أكثر ألأشجار شبه بالضرو, ويقول في وصفه لها أن أوراق الضرو ريشيه فرديه على شكل أزواج متقابله تنتهي بوريقه فرديه , ويتراوح عددها من 13-الى- 19 , وأوراق البطم ريشيه مثل أوراق الضرو لكن وريقاتها أعرض منها ولا تزيد في عددها عن سبع أو تسع أو أحد عشر ورقه.
وشجرة ابو عبدالرحمن لقيت بعض ريش ورقها يزيد عدد وريقاتها على ثلاثين وريقه , وهذي قرينه ثانيه تفرقها عن شجر الضرو ...
الرابعه : شجرة الفتنه اللي جابها مشرفنا العام , نسأل الله لنا وله الهدايه ,شجره شايكه فيها شوك واضح في واحده من الصور على ألأقل , لبينما الضرو وابن عمه البطم خاليه من ألأشواك في حدود أطلاعي ..
الخامسه , في المداخله رقم (18) يقول ابو عبدالرحمن ظننت , وبالرغم من أن الظن أكذب الحديث ألا أن الرجل تاخذه العزه بالأثم ويقول أنه مصر على ظنه ويبي ينقله من ذمته ويحطه في ذمة المرضويه .وانا من جانبي ما أقول ألا لاحول ولا قوه .
السادسه , أظن مثل ما ظن من قبلي مشرف عام (أظنه ابو عبدالرحمن) أن ضروة حليفي ابن همام بطمه , من أجل كذه أنصحه يراجع نفسه ويبطمها ...
الخلاصه : من كل ما سبق واضح ولو لي على ألأقل أن شجرة الفتنه الجديده اللي أبتلانا بها مشرفنا العام في مداخلته رقم (16) وشقر بها عصا القبيله , أقول واضح لي أنهاشجره نكره ولا هي شجرة ضروه ولا حتى جروه , ولا يعرف بدر الدجى حسبها ولا نسبها , واللي جلبها هو المسعول عن التعريف بها , وان قدر الرويعي يساعده يكون أحسن , حتى يحلل هديته , وسلامتكم ...