[سهيل2012]

المحاورة رقم (( 30 ))

وأظنها / الأخيره .. !!

مع زميلي الشاعر ابو نايف ..


أبو نايف

ياسهيـل القـاف مـن شأنـك ترانـا بادعينـه
يعني المياقف تاقـف بالرضـى وألا جبـاري
جتني الأخبار عنك ساكن(ن) وسط المدينه
بعد ماهبت على رأسـك نسانيـس الـذواري


سهيل

يالله تســاعد سـهيل وطالبك يالله تعيــنه
أقف الميقاف يابن العم والله باختيــاري

مصدر أخبــارك ترى كذّاب وحنا عارفيــنه
يخدعك بالحكي وأنته يالعتيبي ماأنت داري


أبو نايف


ماهو بكفيك تخيّر أنت محسوب(ن) رهينه
الله يعيينك صحيح سيوف قِدمك مع شباري
سركم في بير وحنا ي الضلالي كاشفينه
صفرت الصافرة إنذار تعلن للطواري

سهيل

انت وش دخلــك يالملقوف ما بيني وبيــنه
باللسان حصان والفعل الردي كنك مطاري

اكشف السِر وتكلم لا حضر عينك ف/عينه
شغل النور وتنبـّه لا تطيـح مع الكبـاري


أبو نواف

علم مابيني وبينك مير نيتكم لعينه
أنت ماسك لك خطوط مطوله والليل ساري
العشاء ما بين ليه والسديره طابخينه
صيدكم بالبندق أم الخمسه أطيور القماري

سهيل

علمك اللي ضامره يا صاحبي وينك ووينه
قِدْم عينك منعطف قبل الوقوف الاضطراري

العشــا للطيــب اللـي لا حضر دسّـم يميــنه
من عظام المالْ ماهو كبسهْ ورز(ن) بخاري


أبو نايف

كم واحد غادروا عرض البحر فوق السفينه
أنت ليش تقودها ما بيننا عازل حراري
العشاء تخاشروا به دام رطنك من رطينه
مجلسي يا سهيل ماهو مجلسك ماني بضاري


سهيل

ماعليهم بعد طسّوا يا ولد عمّي غبينه
والسفينه ماشيه رغم الصعوبه والطواري

مجلس ٍ ما يدخله راع الطحينه والعجينه
بعد كبرت مالها يا ابن الحموله عمّ غاري


أبو نايف

المزاين حصري لشاشة الساحة عارضينه
أقلب الريموت للمرقاب ياذيب الغداري
أدري إن الطيب من جدك وخالك وارثينه
لكن الأيام هذي مختلف والعقل عاري

سهيل

المزايــن ياحبيــب في قنــاتك عايفيــنه
ماعلينا من غليص ولا علينا من مكاري

ضيفنا الطيّب يبا يقلط على سمن وسمينه
والقضية روّحت ما بين بايعها وشاري


أبو نايف

مادرى عنكـم حبيـب راعـي اعلـوم(ن) ثمينـه
يـوم مافيكـم معـه فـ/ الوقـت لا كاتـب وقــاري
الـخـلاصــة وزكــــم هــــذاك والله لا يـهـيـنــه
مابقى إلا يكتب أسماكم على سجل(ن) تجاري


سهيل

وأنت قبلْ مسجّلك (عزّوز) في خبت الدفينه
خلف بِلّه تتبع الذودْ المفلي في الصحاري

والخلاصة نجمنا فوق النجوم وحاسديــنه
حاسدين الصقرفي صيد القهد ويّا الحباري


تمت المحاورة ..
وإلى اللقاء .. والسلام عليكم ورحمة الله وبركاته ..

وأراكم ع خير وسامحوني .