[منقاش]

عميد منتدى الحياة الفطريه الشيخ سلام سلمه الله : يبدو لي أنه حصل عندكم بعض ألألتباسات , لأن اللي أعطيناه لكم كان هديه , واللي أعطيناه لأبو سيفين وسنا كان منحه مبنيه على ألتماسات تقدموا بها لبابنا العالي وسبقها وساطات وشفاعات , وفوقها , وهذا هو ألأهم , فوقها برشوا الدرب قدامها بقصايد عصماء ومنقه وببايات من روابي جيزان .
شفت كيف الفرق بين الهديه والمنحه ؟؟, والأهم شفت كيف تكون الآليات ألأداريه لطلبات المنح ؟؟, وكيف تكون الطقوس اللي تسبقها ؟؟.
ما فيه منحه تجي كذه أعتباط من الباب للطاقه , لا بد لها من ومن , واللبيب بالأشارة يفهم .
وبعدين انت هداك الله أن ما خانتني الذاكره , أتذكرك أنك كنت تقول في بيت من أشعارك :
لاعندي منقه واهديها @@@ ولا عندي ببايه واعطيها ..
وأنا من جانبي فهمت من هالبيت أنك ما تبحث عن مسالك ودروب الصالحين للمنح ...
وويش تبغينا عاد نسوي لك ؟؟ ..
لكن هذا نحنا وريناك الدرب وانت أبصر بنفسك ..
بعدين يا شيخنا الكريم , السقياء اللي أهداها ابو نقشه لكم حسبتها سهله ؟؟, السقياء ذهب مكتوت وقيمتها في العقاقير الطبيه اللي تستخرج منها , سمعتني والا لا ؟؟, لأن حبة الفياقرا اللي والله أني سمعت بها ولا عمري لمستها أو شفتها ألا أن كان يا ربي في بعض دعاياتها ,,, حبة الفياقرا هذي تراها مستخرجه من ورق السقياء , بس من فضلك لا يدري عن هالعلم ربعنا أهل الديره ونكون وقتها سبب في أنقراض السقياء وسبب في كارثه بيئيه ونحنا اللي نزعم مصبحين وممسين أننا من حماة البيئه ورعاة الحياه الفطريه ....
وبعدين غفر الله لنا ولك ياشيخنا , أنت تحسب الناس من أدعياء حب الحياة الفطريه والبر من أمثال شيخنا ابن همام ومشرفنا العام ابو عبدالرحمن اللي أسبوعيا كل واحد منهم تلقاه متلقي له خايعه والا شعيب يتخملى فيه , تحسبهم صادقين في زعمهم وحبهم للبر والحياه الفطريه ؟؟.
لالالالا , هالأثنين وغيرهم أثنينات وثلاثات أدمنوا على الحبه الخضراء مدري زرقاء وساروا يتزارقون من شعيب للثاني دوره للسقياء وقطافها , ولا يعودون لبيوتهم ألا محملين بالغنايم وبخياش وبطاين مدحوسه الى أفمامها بورقانها ؟؟.
فرجائي تجود قردك لا يجيك أقرد منه , وتستثمر سقياك في العلوم اللي بيناها لك , وفوقها خليك متفائل واسمح خاطرك واسلك دروب السالكين حتى أمنحك الركح المزين اللي تشوفه في الصوره اللي سد الشلال اللي قدامك , أسلك مسالك الصالحين حتى تظفر به منحه من أبو نقشه , لكن بشرط واحد وهو أنك ما تزرع فيه ألا السقياء .
هذا كل ما لدينا , والمعذره أن حصل منا قصور , وشكرا ...