[منقاش]

الشيخ سلام سلمه الله , أعضاء هذا الكنفيوتر من ثملان وغيرهم
السلام عليكم ورحمة الله وبركاته , والله يسعد مساكم جميعا , وكل عام وانتم بخيربمناسبة الدنقه, وبعد :
الحقيقه يا شيخ سلام أني كنت ناوي أشيل واحده من نجومك حتى ثاني مره قبل تغيب تستاذن مني حتى أكلف حليفي الدكتور مشعان يمسك عملك بدالك .
لكنكم مع بالغ ألأسف كلكم ألأثنين غبتم , وعلى ألأقل أنت أبديت عذر وهديت من حنقي يوم عرفت أنك رحت تمشي في الشعاب والوديان حتى وقفت على شجرة الندغ وغيرها , وصورتها .
وهذا العمل الجليل يكفر هذا الخطأ وعشرين خطا من بعده , أما الدكتور مشعان غاب عن شغله عشره أيام وعود وباشر بدون أعتذار ولا رد أعتبار , ولا كأن المنتدى ألا زريبه ؟ , وأخاف أنكم ألأثنين خويا في هالرحله , ومشتركين في هالمؤامره وكل ما سبقها من مؤامرات بما فيها الكمره الخفيه والكمره أم بليه ...
نعود لموضوعنا , واقول كلامك جميل اللي كتبته ياشيخ سلام عن الدنقه , ولا أدري حركة التدنيق مشتقه من منظر آكل الدنقه يوم يضيع ويدنق براسه , والا الدنقه أسمها مشتق من الفعل دنق ؟, هذا سعال ننتظر جوابه منك يا شيخنا العزيز .
أما الصور اللي حطيتوها فبعد رجوعي لمرجعي الله يحفظه اللي أصبح معروف عندكم , كان الجواب : اللي في الصوره ماهو الدنقه , وأنما حبوب متطفله تطلع عادة في سنابل الشعير والذره يسمونها السواد (بضم السين وتشديد وفتح الواو) , وسموها بهالأسم لأنها تسود بالدقيق اللي دخلت في حبه وتمرر به .
أما الدنقه فهي نبته منفصله , وحبوبها مدوره ملساء أكبر من حبة الدخن وأصغر قليل من حبة الذره , وتصبح سوداء اللون أذا أستوت .
وكان ألأولين ينبهون على النساء اللي يطحنون الحب على الرحى حتى ينقون الحب من الدنقه قبل طحنه . وقصص الدنقه كثيره لكن أطرفها يوم يروون أنه قبل خمسين عام تغدى واحد من عمد الطايف الكبار بقرص قد ما نقى طاحنه حبه من الدنقه , وآخر العصر والعمده يدور على مسجد الهادي ويحرج بأعلا صوته ويقول : يا أهل الطايف , الحاضر يعلم الغايب , مسجد الهادي تحت الحراج , والمناره خارج البيع , يا من يزيد ونبارك .
وبعدها ساروا يقولون أنتبهوا ونقوا الحب من الدنقه قبل تطحنونه حتى لا ينزل مسجد الهادي للحراج مره ثانيه ويخلف وراه المناره ....