رد: هكذا هى الحياه
عنتر ده اسم محل صغير موجود فى شارع أحمد كامل فى فيصل المحل ده بمجرد ما بعدى من قدامه بحس بطوفان من الذكريات
بالصدفة النهارده كنت بره انا ومامتى ووقفت قدامة عشان ماما كانت بتشترى حاجة من محل قدامه فضلت قاعده فى العربيه ابص على المحل اللى تفاصيله متغيرتش من ساعه ما كنت طفله وحسيت بسعاده مش طبيعية وانا بفتكر نفسى و انا صغيره يوم الجمعه لما كنت بخرج مع بابا ونقف عند المحل ده وبابا يشتريلى شوكولاته كورونا " كنت بحبها اوى وانا صغيرة" والبتاعة اللى فيها صابون دى اللى بتطلع بلالين وكل الحاجات الحلوه اللى بحبها من شيبسى وعصير وخلافه
مش عارفه حسيت انى عايزه انزل أجيب اى حاجه من المحل حسيت انى عايزه ارجع طفولتى تانى .... نزلت من العربيه وروحت قعدت اشترى حاجات كتير اووى وفضلت ادور على الشوكولاته الكورونا بس يا خساره ملقتهاش وانا واقفه بشترى الحاجات دى لقيت طفله صغيره جاية مع جدها وعمالة تقولوا يا جدو عايزه شوكولاته مش عارفه حسيت فى لحظه انى شفت نفسى بجد وانا صغيرة فى البنت دى وحسيت احساس مش طبيعى حسيت انى رجعت طفلة عايزه تلعب وتجرى وتشد باباها عشان يجبلها شوكولاته ولعب
يااااااااااااااااااااااه نفسى ارجع طفله تااااااااااااااااااااااانى واحشنى اووووووووووى الاحساس ده
|