[منقاش]

بارك الله فيك يا شيخ سلام , وكثر الله من أمثالك , ومشكور على هالقصه الجميله والمعبره , اللي نقلت لنا فيها صوره من صورالماضي والبساطه اللي كانت عليها الناس , بالأضافه للأمانه وحسن الضيافه وطيب المعشر واحترام وتقدير الغريب , وغيرها من ألأخلاقيات والسجايا اللي كانت عليها الناس يوم كان الناس ناسا .
المية الريال كانت مبلغ كبير , بسبب ندرة السيوله من جهه, وارتفاع القيمه الشرائيه لريال أهل هذاك الزمان من جهه ثانيه.
ويمكنك لو رغبت تعادلها لنا بما يعادلها من عملة هالأيام , يمكنك تقيمها بقيمة المواشي في عصرها وعصرنا . وأتوقع أنها ما تقل عن ألفين ريال في القيمه الشرائيه لفلوس هالأيام , ولا تقل عن العشره آلاف في القيمه النفسيه والأعتباريه هالأيام , بسبب زيادة السيوله المتداوله في أيدي الناس .
ولا أخفيك أن هالقصه سببت لي توارد خواطر أضحكتني, والخاطره المضحكه قصه حقيقيه , وبعض فصولها مخجله وابغيك يا شيخنا تحمل أنت والقراء الكرام بعض الكلام اللي تقرونه فيها , ومن أجل كذه نبي نقتدي بك في الترميز لأصحابها .
يقول الرواه أن بطل القصه كان مثل أهل زمانه , لا عندهم بنوك يودعون فيها دراهمهم , وعملتهم كانت حقيقيه وراس مال فعلي من فضه وذهب , يعني الريال فضه والجنيه ذهب .
وهذا هو راس المال الفعلي والحقيقي , ماهو السندات الورقيه اللي يسمونها فلوس ويغطونها بالذهب والفضه , والا سند الدولار اللي ماله غطا وعورته مكشوفه , واللي يبيعونه على الناس بمية سنت في الحين اللي ما تكلفهم طباعته ألا خمسه سنتات , يعني نصب في نصب ونهب عيني عينك , ومكسب 95% , لا يكسبه لا ألأمريكان ولا غيرهم من الشعوب , وأنما نصب ينصب مكسبه في جيوب أصحاب المصارف الصهاينه اللي يمتلكون أسهم البنك المركزي ..
آسف , نعود على قصتنا , يعني اللي عنده عمله في هاك ألأزمنه يجودها ويدخرها ولا ينفقها , ولا يعلم أحد بعددها ولا بمكانها حتى لو كانوا عياله, والمجتمع أيامها منتج وشبه مكتفي ذاتيا , ولا هو أستهلاكي مثل مجتمعات زمانكم , وراعي الدراهم ما عنده تحفيظ لها ألا تامينها وديعه عند بعض الثقات , أو دفنها في ألأرض .
بطل القصه كان كل ما جمع كم جنيه ذهب والا كم ريال فضه ودعها عند مامون , والغريب أنها كانت مرأه كبيره الله يرحمها .
مرضت حافظة الأمانات مرض الموت , وأرسلت لأصحاب ألأمانات قبل موتها وطلبتهم أخذ أماناتهم , ومنهم بطل القصه الله يرحمه .
أخذ الرجل وداعته واتجه بها لبنك زمانه , ودفنها في ألأرض اللي تبرت من ألآمانه وحملها ألأنسان أنه كان ظلوما جهولا , وتعرفون فلوسهم في هاك ألأيام ذهب والا فضه ما ياكلها لا الصدا ولا دابة ألأرض ولا الفيران .
لكن الرجل يوم قبرها , ما دفنها في أرضية دار من الدور والا خفاها في جوف جدار من الجدر .
لا لا , الرجل دفنها بليل أظلم في ظهر حدب من الحدبان , وبعد دفنها قضى حاجته على مدفنها , أو على ما قال المخاوي سلح عليها أكرمكم الله .
وسار كل كم يوم , يمر بغنمه من حواليها ويسوي عليها أنزال مسلح مثل حق ألأسرائلين على السفن قبل أيام , وأقلها يطير الماء عليها الله يكرمكم ..
واستمر كم سنه يتعهدها بالزياره ويسمد فيها بالأسمده العضويه البشريه حتى يموه عليها وينفر أي مار أو متطفل من ألأقتراب من المكان..
وبقيت في الحفظ والصون , ولا أستخرجها من بنكها ومكمنها السري حتى جات حاجتها بعد خطب فتاة أحلامه , ودفعها فيها مهر وباقيها على تكاليف القرى والزواج , ونتيجة أستثمارها عقب من المخطوبه سته من البنين وعدد من البنات .
وختامها , ويش رايكم في بنوك زمان ؟ , ماهي أحسن من البنوك الربويه في زمانكم ؟, وويش رايكم في فلوس زمان اللي كانت ما يضرها لا تضخم ولا حرب عملات ولا حروب حقيقيه ولا صدا ولا عثه ولا غيرها ؟؟ .
يعني تزيد ما تنقص ....حتى زكاتها أظن بعضهم ما كان يخرجها ويؤجل حسابها ليوم الحساب , يوم تكوى بها جباههم وجنوبهم , هذا ما كنزتم لأنفسكم , فذوقوا العذاب بما كنتم تكنزون,وآسف على ألأطاله, وسلامتكم ..

المشرفين الخونه : وين راح الفرمان من توقيع سماحتنا ؟؟, وين راحت المعلقه اللي نذيل بها خطابات سيادتنا ؟؟. أحذركم وأنذركم تعيدونها قبل توجبوني أنزل لكم كم موضوع تكون سبب في حجب منتداكم , ومن أنذر فقد أعذر ...