مستور العصيمي
سلام ردية تدخل بيوت المجد والطيب
ياجعلها ماتزول ولا يغيرها الزماني
ياذيب ياللي تجر عواك ليش عواك ياذيب
مدري من الجوع ولا طاري لك علم ثاني
صياف الحربي
الله يعز الرجال اللي تعدي فالمراقيب
ترسي كما يرسي البابور في شط المواني
لو العصيمي يواجهني على عوج العراقيب
اباخذ السيف من يمناه واحرك لساني
مستور العصيمي
... فك السلوك اللي تود العلم وتجيب
واللي عطى العشر ياصياف ما يقبل ثماني
العام ياصاحبي مافيك عيب ولا عذاريب
لكن هذا السنه تلدغ سواة العقرباني
صياف الحربي
اليا اخلفتني هجوسي عنك حَصْْلت شقت الجيب
ماعندك اللي يحفر البير ويسوق السواني
ان طال عمرك بعد مده قصيره يطلع الشيب
واقول سافر من الدنيا لو انك من خواني
مستور العصيمي
ماتعلم الغيب ياصياف وآنا ماعلم الغيب
لكن نورك تغير ليش ياسهيل اليماني
لن جات بالطيب ولا جات بخشوم المشاعيب
ساعه بساعتك ماتعدل لها خمسة ثواني
صياف الحربي
تغير الوقت يالصاحب وخبثنَّ المشاريب
وان شدوا الناس قام شعيل يرثع بالآواني
انت الصحيب الغشيش اللي طلع بين الآصاحيب
جتني علومك مع العربان وآنا في مكاني
مستور العصيمي
تغير الوقت غير اهله بلا شك ولا ريب
ترى العرب مايخلطون الهرايا بالسماني
قصدك تجنب وآجنب مير مالي عنك تجنيب
امرح وتصبح بخير وعافيه يامودماني
صياف الحربي
والله لدوَّر مع العربان لين القى معازيب
واني لقابلك بالحاره وعمدتها يماني