[منقاش]

يا شباب , لا تجوزون , لا تجوزون , وعليكم بالصوم .
نصيحه , لا تجوزون , وهو ناقصكم دوشة مخ ووجع راس .
لا تجوزون ألا بشروط
واحد : مهر معقول , ما نقول خاتم أو سوره من القرآن , لا.
نقول من الأربعين ألف وجاي , وكل ما قل كان أفضل , وتذكروا أن أقلهم مؤونه أكثرهن بركه , وبشرط رضى العروس لأن الصداق حقها ولا يفرض عليها شي ما ترضاه .
أثنين : نكبه (شبكه) ما فيه , كفايه نكبات .. يكفي ثنتين من الغنم ليلة الملكه مع ما يجود به الجواد من هدايا للعروس .
وبعدين يا ربع الشبكات , يا متخلفين , يا مقلدين تقليد أعمى , الناس اللي تقلدونهم أنتهوا من موضة الشبكه من عشرين سنه وأكثر , وأنتم أستلمتوها بعد تركوها , لكن شدوا حيلكم ترون جحر الضب طويل لأن
اللي تقلدونهم فاتوكم بمراحل بعيده , وبطلوا حتى من الزواج , ولا عاد فيه ولي أمر ولا مهر ولا نكبه ولا نفقه ولا ميراث .
يا بلاش , وسار الرجال تلاقيه وتسأله , كم ياللحيه الغانمه عندك من العيال ؟, ويجاوبك أن عنده أثنين والا ثلاثه .
وأذا سألته , كم عنده من الزوجات ؟, يجاوبك , ولا زوجه .
شفتم كيف حل عندهم الرخا , والورعان سفاح , واغلب ما يبلش فيهم ميتهم (أمهم) المسكينه , تشتغل صباح ومساء حتى تجيب اللي يربيهم , وتلعن الساعه اللي تعرفت فيها على الرجال .
ومع كل هالفضايح والمآسي , القانون يعترف بالورعان وينسبهم لأبوهم , وأحيان أذا ألأرواح تآلفت وحل قبول نفسي بين ألأم والأب وهم في الخمسينات أو الستينات , تزوجوا الزواج الشرعي .
ناظروا وراكم وشوفوا المسافه اللي قطعتوها ؟, وناظروا قدامكم وشوفوا المسافه اللي باقي عليكم ما قطعتوها حتى تلحقون بالربع اللي تقلدونهم وتاصلون لنهاية جحر الضب ؟ .
ولو دخلوا جحر ضب لدخلتموه ..
لا , ولا يكفيكم أنكم تقلدون تقليد مستورد ,, لا لالالا .
تزيدون عليها شويه من مواريث الجاهليه , وتطلبون أكله قبل القرى , لأنكم تعتبرون اللي طلب يد بنتكم أجنبي ومن خامس ثاني , وخامس البنت عيب يتبعونها ويحضرون حفل زفافها مع سادس العريس..
وهذا الغلو وصل فيه عدد الغنم اللي ذبحت في واحده من ألأكل (غدا) (15 ذبيحه) (بالعربي : خمسة عشر ذبيحة , غير توابعها من الملال والسمن والعسل وغيرها) , والعريس ثمالي والعروس ثماليه بشهادة طباخ ثمالي أذا أصريتم أعطيكم أسمه .
ويستمر الزن على العريس , ليه ما تسوي مثل الرجال اللي قبلك وتستاجر أكبر قصر ؟ , وليه وليه ..الخ , وكلها ديون يتقحمها المسكين في غياب الموجه الرشيد و ويبلش في تسديدها وعياله في المتوسط والثانوي , ويضيق بسببها على نفسه وعياله ...
وبعد , تسألون , ليش الشباب يعزفون عن الزواج ؟.
الله لا يلومهم ,, اللوم على الأباء والأمهات اللي مع القوم يا شقرا , أمعات , أن أحسن الناس أحسنوا , وأن أساء الناس أساءوا معهم .
واللوم على الرجال اللي تخلت عن القوامه وسلمتها لنساها , وما أفلح قوم ولوا أمرهم أمرأه .
وهذا ما يعني أن ما فيه نساء رشيدات , وأحيان أرشد من كثير من الرجال .
يوجد نساء ونعم بهم , ويصدق فيهم كلام الشاعر اللي يقول :
ولو كن النساء كمثل هذي @@@ لفضلت النساء على الرجال .
فما التأنيث لاسم الشمس عيب @@@ ولا التذكير فخر للهلال .
لكن للأسف , ماهم كثيرات حتى يوقفون في وجه هالمهازل اللي تبي تضر في النهايه النساء قبل الرجال ....