[منقاش]

اخويه مراسل ثقيف : يشكرك ابو نقشه على ثناءك على ما قال , وثق ما مدح فخامتنا احد واثنى علينا وعلى كلامنا الا ولقي خير , ولا وقف في طريقنا احد الا تلقته الأهوال وحل به الخبال , وهذا هو المخاوي امامكم مثال حي وفيه عبر لكل من اعتبر نسأل الله لنا ولكم السلامه من مثل ما حل بهذا الشقي المسكين ..
نعود لموضوعنا:
انا ما حصل لي الشرف بمعرفتك , وانا والله ما ادري هو من أنت ؟, لكنه واضح لي من كتاباتك انك رجل تخاف الله ان شاء الله ويكفينا منك ويكفيك منا أخوة الأسلام والتحاب والتباغض في الله , ومن هالمنطلق (الأخوه في الله) يهدي لك العبد الخطاء نصيحه غاليه وهي أنك تسأل الله العفو والعافيه من كل الفتن , ولا تقول كلمه الا وتنشد من وراها رضى الله والأستجاره من سخط الله , وتستعيذ بالله من الفتن ما ظهر منها وما بطن ومن الفتنة الصماء البكماء العمياء اللي من اشرف لها استشرفته , وقع اللسان فيها اشد من وقع السيف ,(طبعا هالنصايح كان الأولى بها كاتبها اللي يقع فيما ينصح الناس عنه , لكن ويش السواه وويش هي البصيره اذا كان هذا الواقع سبقنا عليه النجارين اللي يصلحون بيبان الناس وبيبان بيوتهم ترقل (مخلعه)؟؟)...
مقولة ان رفع الرواتب ما يحل المشكله كلام خاطي 100% , لأن الغرض من رفعها هو تعويض النقص في قيمتها الشرائيه حتى تساوى في القيمه الشرائيه مع قيمتها الحقيقيه يوم صدور مرسوم صرفها قبل عدة سنين , اما اذا كنت مع من يقولون لا تزيدون الرواتب وانت داري انها نقصت في قيمتها الحقيقيه فأنت في هالحاله من وجهة نظري انحزت لمن يبخسون الناس أشياءهم..
بقية الناس اللي ماهم موظفين حلها في وضع حد ادنى للأجور بمعدل لا يقل عن 25 ريال للساعه , وساعات عمل محدده في اليوم ما تزيد عن ثمان ساعات الا بمقابل , وقفل باب العماله الخارجيه اللي أغرقت الأسواق وبعضها للأسف بوذي وهندوسي ومجوسي ..
بعباره ثانيه , التجارب البشريه ثريه في هالجانب ولا نحتاج الآ الى تطبيق احسنها من ما لا يتعارض منها مع ديننا , ومن واقع التجربه اضرب لكم مثل بواحد من البلدان اللي كنت فيها يوم من الأيام ورغبت انظف البيت وحصل ان اللي نظفته مرأه لوحدها , هذا عملها المستقله به بمفردها وتجني منه نفقة اسرتها واقساط بيتها اللي اشرته من مهنتها , وغيرها الميكانيكي والنجار واصحاب المهن الصغيره كلهم يعولون اسرهم ويوفرون الباقي لمستلزمات حياتهم من عملهم , لأن سوق العماله تستوعبهم بالأجور المجزيه ..
اما عندنا فالسوق مغرقه الى حد التخمه بالعماله الأجنبيه اللي تحيا على اقل من الكفاف وتسكن في مساكن جماعيه اغلبها غير انسانيه , وبعد هالمعاناه والمكابده اللي يلقونها رمضاءنا اهون عليهم من النار في بلدانهم ويرضيهم في الشهر توفير مبلغ زهيد يعد بميات الريالات يرسلونها على اهاليهم .
في سوق عماله ومنافسه مثل هذي خرج اهل البلد مكرهين من المنافسه لأنها خاسره , ولو لي من الأمر شي كان وقفت العماله ألأجنبيه ما عدا اليمنيه لأنهم اخوه في الدين وجيران في الوطن وفقراء في الحال ولا يؤمن من بات شبعانا وجاره جائع .
اوقف العماله ألأجنبيه حتى يصبح الحارس بخمسه آلاف على الأقل والسايق وعمالة المنازل بالمثل والعامل في البقاله مثلهم , والمدرس والمدرسه في المدارس الأهليه برواتب لا تقل عن عشرة آلاف ريال بدلا من الألف والميتين اللي تعطى لبعضهم وهي ما تكفي لمواصلاتهم ..
ووقتها ما يفتح البقاله متستر , ولا يفتحها الا واحد متفرغ لها يعرف ان دخلها يحرزه يفرغ نفسه لها , ومثلها بقية الحرف الصغيره والمتوسطه , وزيادة الراتب اللي دخلت في جيب الموظف يبي يروح جزىء منها للبقال وجزىء للخضري والتماس والنجار وبايع الملابس والخرده الخ, وهكذا لا تبخس الناس اشياءها ويرزق الله بعضها من بعض.والله اعلم..الخ ..
وفي الختام سؤال يتطلب منك الجواب : وراك تستخدم اللون اللي يكتب به الشيخ ابو نقشه ورفقاه ؟, ما تدري ان حقوق اللون محفوظه ؟؟...