[الحاج سلام]

الاخ سهيل سلمه الله ومن يسمع عجبتني سوالفكم وابي اشارك يسالفه طريفه وواقعية ولها علاقة بسلوم العرب في شرب قهوة المعزب

كان في ضيافتي بدوي من الصحراء قح ما يعرف من القرآن غير الفاتحة والمعوذات المهم بعد الغداء عرضت عليه يخاويني في زيارة معرض الماني للاغذية وتجولنا وهو منبهر من الخواجات اللي يعرضون ويقدمون هدايا رمزية المهم مرينا على واحد يعرض شراب بيرة بدون كحول طبعا ويوم يشخبها من مكينته يصدر لها صوت ورغوة كنها حليب خلفة والبدوي وقف عندها وقلت له هذي ما تصلح لك قال الا والله مناسبتني وابي اذوقها وشخب له الالماني قي قوطي طوله ذراع لين ملاه ومده له ويوم ذاقه وهو مر وجفل منه وبغى يرده والالماني ملاحظه ويناظره قال هو وراه يناظرني كذا قلت لانك كزييت من طعم قهوته وشوف وجهه احمر وعيونه تطاير شرر ان ما شربتها يبي يسير علوم قال خوي انت صادق قلت جاك العلم وانا اتحدث مع الخواجه وكني اوريه انه غضب من رفيقي حاول البدوي مره ومرتين ولا امكن الا شربها كلها يوم قفينا قال ابوك يا خويي اثر سلومهم مثل سلومنا
وسلامتكم