مع شاعر جزل معرفه : نظام ساهر
والبداية مع الشاعر نظام ساهر
كـل بنكــنً رصيده يصـرفه في حرام
ولا أنا بنــك شعـري راصده للسديس
قــوم ياصاحبــي ياسهيـــل شد الحزام
دام مصــدر حـلالك مـن قناة السويس
سهيل
بنك شِعر ورصيده شِعر ولا كلام
بنكك اللي تمدّح به مديره بليس
كيف أشد الحزام وساهر أسوأ نظام
فقر الشعب وأكثرهم طعامه تميس
نظام ساهر
يخــزي الله شياطيــن الحســـد والحرام
ولا انا زود شعري يكتمك وسط كيس
ساهــر يؤدب اللـــي مامشــى بأحترام
مــار كــل العرب ظني ضحية لميس
سهيل
يالعتيبي تخيّر بين حرب وسلام
والوعد بيني وبينك نهار الخميس
كان ساهر وقف لي في طريق الغرام
الله يعوّضك في وصل ليلى يا قيس
نظام ساهر
خيرتي كان جات الحرب قسمي سنام
وأن بغيت الســـلام علــومنـا ماتخيس
العــقـــول الخــفيـفــه قــدمـنــا ماتلام
والعوض فالتفاهم تجربه قـــرن تيس
سهيل
لنوايا مطـايا نية سهيل شـام
ننتظر لين يا ساهر يموت الرئيس
فزعتك يا ابن عم سهيل شد الحزام
هاتوا أحلى عروسه والعتيبي عريس
نظام ساهر
ريــس الـــــشام ظني مايجيه انــهزام
وانت نيـــــتك يأبــن الــعم نية نحيس
ابـشــــر بفزعتن تاصل بلوغ الـمرام
وكان جت للزواج انته عريسنً تعيس
سهيل
ريس الشام في خشمه تراب وعـرام
لعنة الله عليه المجـرم أكبـر خسيـس
فزعتـك يالعتيـبـي يــا رفـيـع المـقـام
فزعة ابن المحيا لابن عون الرويس
وسلامتكم وإلى اللقاء في محاورة قادمة إن شاء الله