[منقاش]

بنتنا السنافيه : موضوعك مهم وأيجابي , وكنا نتمنى واحد يتبناه , لكن حتى يثمر الموضوع ويستمر يحتاج لعدة تضبيطات بالأضافه لطول النفس اللي أن شاء الله أنه متوفر عندك .
الضابط ألأول , مكان هالموضوع في منتدى التاريخ والتراث حتى يشارك فيه جهابذة المنتدى هناك , وحتى يكون في مكانه الصحيح .
الضابط الثاني , أقترح عليك يا راعية الموضوع تقسيمه لحلقات , كل حلقه عن دايره واحده , فمثلا , الحلقه ألأولى اللي نتناقش فيها حاليا كانت عن دايرة معاميل المقهاه ,(وانتبهوا , ترون القهوه غير المقهاه , القهوه هي البن , والمقهاه هي البن والشاهي وما يمشي في ركابها من قشر والا غيره) .
وهذا الضابط ضروري حتى لا يطول الموضوع , ويمل منه المشاركين وينتهي مثل ما أنتهى له قبله موضوع سابق وشبيه بهالموضوع وهو المفردات القديمه , وأظن الراعي له كان مشرفنا المبدع سابقا , أبو ملاك .
الضابط الثالث , عدم التركيز في طرح المفرده على أي مفرده لا زالت حيه مثل كلمة دني (دني لي الحاجات) , والتركيز على المفرده المنقرضه تماما أو اللي أوشكت على ألأنقراض .

وهالحين نجي نعلق على المفردتين الجديده اللي طلبتم التعليق عليها وهي الزبادي والمصفاه .
المصفاه : مفرده من مترادفات أسم الدله , مثلها مثل الشاذليه , لكن المصفاه هي الدله الفاضيه بدون قهوه , وأذا تعبت بالقهوه ما عاد تسمى ألا دله أو شاذليه , والدله تطلق في ألأصل على ماعون القهوه فاضي أو مليان , وتطلق مجازا على القهوه , أما الشاذليه فتطلق في ألأصل على القهوه , وتطلق مجازا على الدله المعباه بالقهوه .
الزبادي : الطيس , وحضورها مع معاميل المقهاه لغرض معونة الماء حتى تفضفض فيها الفناجيل .

طبعا , الشاعر في النشيد كان من الشعار اللي يحشون ألأبيات بالكلمات على حساب المعنى , وهذا يكشف ضعف الشاعر وقلة أستحضاره لمفردات تتسق مع المعنى , يعني ركز على المبنى وهلهل المعنى يوم قال :
ودني لي العازات خمسا وثنتين @@@ دله ومصفاتين واربع زبادي .
والعازات في البيت سبع , وهي ثلاث دلال (دله ومصفاتين) + اربع زبادي .
وليت ألأخوان يصححون لي فهمي أن كنت مجانب الصواب , وشكرا ..