[منقاش]

يالله مسا خير , أمسينا وامسى الملك لله .
ابن عمي الشيخ سلام الله يسلمه ويسلم الجميع من كل مكروه
السلام عليكم ورحمة الله وبركاته , وبعد :
يا رفيقي والله أني فكرت أترك منتدى الحياه الفطريه والأعتكاف في ألأستراحه لولا أنك جيت على ذكري جعلك الله من الذاكرين , والسبب يبن عمي خوفي أني أمصخها بالمزوح في مكان يغلب على كتابه ورواده الجد واكون سبب في ضيق لأحد أو تبرم من أحد وأنا أنشد أني أوسع صدور خويايه وابعد الرتابه عنهم .
على كل حال نعود للموضوع , واقول في مستهل حديثي ترى مثل ما أنت هوايتك الغرفان , أنا هوايتي ألألقاب المفخمه وألأسامي اللامعه , فمثلا ألأخ هذا المستجد على منتداكم أبن عمي المسمى بهلال أبو ليله والمعروف بملقاط المفروض يبقى على ملقاطه ويبطل جلب ألأسامي ألأصليه , لكن طالما أنه فتح علينا باب من بيبان فتن ألأسامي ترون أسمي ألأصلي بدر ابو ليالي المعروف بفخامة الحاج الشريف منقاش .
أما موضوع البكى وتسمية بكه والبلسم سواءا كان مفقود أو موجود فخذوا من أبو نقشه كلام لكن لا تطالبونه بالمراجع لأنه رجال قرايته وكتابته ضعيفه ويكره الكتب من أيام دراسته في الكتاتيب والليليه وأرهاب المدرسين ,
وحتى تجون للعلم من أوله لا بد ترجعون لتاريخ اللغه العربيه وبنات عمها من اللغات الساميه , وبالتحديد اللغه العبرانيه أو العبريه لغة بني عمومتنا عيال يعقوب ومن قبله أسحاق وابراهيم عليهم السلام , أو سموهم بني أسرائيل (يعقوب).
العبريه والعربيه في ألأصل توأم ويلفظها العبرانيين ها عرفيت (العبريه) وها عفريت (العربيه) , وها تعني أل التعريف .
ويا كثر الملايين من الكلمات اللي باقيه الى اليوم في العبريه وتكاد تختلط بالعربيه , وخذ مثال اليد مفردها يد ومثناها وجمعها يدايم , ورجل , ريقل ورقلايم , وبني آدم , أبني آدم ,,,, والكثير الكثير من ما لا حصر له .
وأقصد من هذي المقدمه أن شجر البكى تسميتها في العبريه بكايم والعربيه البكى للجمع , وبكه للمفرد , ومن كثرته في غابر ألأزمان في مكه المكرمه ونواحيها سميت مكه ببكه من أسم الشجر المشهور فيها ببكه للمفرد وبالبكى للجمع , وانتبهوا لا يجي واحد ويقول , حددوا لنا أسم واحد لمكه , أنتبهوا ترون كما قال لكم رويعي الغنم , من ثراء اللغه تعدد المترادفات للأسم الواحد مثل يوم تقول مكه وبكه وأم القرى وغيرها.
البلسم هو واحد من ألأشجار ألأخوات الثلاث , اللي تحمل اليوم ألأسماء الثلاثه , البشام والبيشم والبكا , كيف تميزونه من الثلاث ؟, الجواب : علامه أولى , اللي فيهم تفرز ماده صمغيه تشبه الدمع هي البلسم ,,, وعلامه ثانيه , اللي فيهم أذا هبت عليها الرياح تصدر سيقانها وبعض نواميها صوت قريب من صوت النشيج أو البكاء هي البكى أو البلسم أو البلسان.
هذا هو الجزء ألأول من مداخلتي , وحتى لا أطيل عليكم يجيكم الجزء الثاني في مداخله ثانيه على الموضوع .
وبما أنك يا شيخ سلام سبق وسعلتني عن مدايح الشعراء في ابو نقشه فرايح أرفق لك وللقراء 99 قصيده من ديوان مدايح الشعراء في الفقيه الشريف المسمى : بدر ابو ليالي , والمكني بأبو نقشه والمعروف بمنقاش .
وهاك أنت والقراء أول قصيده فيها لأمير الشعراء وسيد الفصحاء الشاعر لبشه .
واللي يقول فيها صح لسانه :


الليـل ياهاجـوس لبشـة ماتعـوزك كلمتـيـن@@وظّف حروف الشعـر مابيـن المـرارة والحـلا
لازان طـاروق القصايـد قولـهـا لاتستكـيـن@@ماهي طلاسم سحـر والا مـن حسـاب الجمّـلا
ان قالهـا لبشـة ولاصدّقتـهـا ديّـنـك ديــن@@والديـن يطلـب لويطـول الوقـت والا يمـهـلا
الأولة شفت الهديـة بيـن خشـم وبيـن عيـن@@مضفي عليها من حروف الجر(من.في. عن. على)
لوقلت جبنا الما طلـع فـي دلوهـا ثلثيـن طيـن@@كلّ المحال ولاصفا المشـروب مـع جـذب الّـدلا
دام انـت ماتحسـب حسابـك للكـرام الكاتبيـن@@لابـد فـي يـوم القيامـة عـن كلامـك تسـألا
قـدّام لاتنـدقّ دقّ الحـب فـي وسـط الجريـن@@أحسـن لياقـرّب عليـك الـدور تعطيهـا جـلا
المستحيل انك تجيب الذيـب جنـب اباالحصيـن@@والذيب مايخشـر علـى زاد الحصيـن الاشهـلا
خلك على دينـك ولايجذبـك غيـر الديـن ديـن@@لن كـان تومـن بالرسالـة والرسـول المرسـلا
اعلم وعلم مـن غفـل عنهـا عساكـم سالميـن@@وانا ترى قلبي عن اللـي فـي وصايفهـا سـلا