[أبو خولة]

السلام عليكم ورحمة الله وبركاته...

ما شاء الله..الحبايب كلهم متجمعين هنا على الدكة ولا تعلموني..
شعار ومصممين وإدارة وكتاب خواطر ومثرمدين..
ما ناقصنا إلا صديقي اللدود المنديالي..
عسى الله يرجعه بالسلامة..
بس ترى الحقوق محفوظة لصديقي اللدود إذا رجع نرجع للثرمدة..!

مساكم الله بالخير جميعاً..كلاً باسمه..

جبت لكم معي خيمة مقطورة.. عشان ما يمن علينا حبيبنا أبو مهند بدكته المصدعة..!

http://www.4cyc.com/play-99EHFJNG6i8



تروا أناأحب استمع أكثر مما أتكلم..وتعجبني هروجكم وعلومكم كثير..

والمنتخب تروني مطلقه من بعد عام 94م ..
بعد ما أصيب بسرطان الكوره..عسى الله يشفيه منه..!
لأني أنا من جيل الإنتصارات عام 84م ..
كنت ذيك الأيام بالصف السادس الإبتدائي..
واضنك يابو مهند كنت ذيك الإيام بحفاضتك<< دعابة لا تزعل..!
ذيك الأيام كانت المستديرة لها طعم غير..
أيام الأسطورة ماجد..والمدفعجي أحمد جميل..والظهير الطائر عبدالجواد..
والخلوق فهد المصيبيح..والكوبرا محيسن..وجا بعدهم الفيلسوف الثنيان..
وجا بعدهم جيل آخر موهوب أعتقد لحقتوهم في عام 86م..
الله يسقي ذيك الأيام..
حتى الجمهور والمشجعين ما هم مثل هاليومين
طايحين تخريب وتكسير وتعصب رياضي ماله داعي..!
تدري أني كنت ذيك الأيام ما كنت أقول ذا أهلاوي وذا هلالي وذا اتحادي..!
كنت حتى قبلها ما أفرق بين الأهلي والهلال..!
إذا تباروا أبيهم يتعادلوا عشان كنت أشجع الفريقين..!
لين جانا الإعلام السلبي من أشباه الكتاب والصحفيين..
وزرعوا فينا التعصب الأعمى للأندية ..!!
مالكم بالطويلة.. ولو قلت كل اللي عندي ما راح أنتهي..! وممكن أشتل شتله توديني بدهية..
وساعتها لا بتقدرون تجيبوا لي لا حلاوة ولا غيره..!!!
خلني ساكت أحسن وأسلم..!

وترى الكلام اللي قالوه الإثنين الأخيرين اللي بالفديوا قلته زمااان أمام مجموعة كبيرة بالعمل.. كانوا يتناقشون عن هزايم المنتخب..!<< وما أن انهيت كلمتي إلا وهم يدرمحوا بروسهم ويتناسلون واحد ورا الثاني
من الخرعة لين ما بقيت إلا وأنا وحدي..!
ويا خوفي تسون مثلهم..!

بس يتورالي وأنا ما هو بذاك المتابع مثل أول أن المنتخب
أفضل من الفترة القريبة اللي مضت<<ماهو الطموح اللي نبيه لكن أحسن..!
أعتقد أنه اليوم قدام الأردن بسوي شي..
وما راح أقدر أحكم عليه اللي قدام اليابان..!

هذا علمي وسلامتكم,,,