[المنديالي]

الله ياسهيل على ذا الموضوع الكايف

ماجيت الا على سؤالك الاقشر الله يخارجنا لا والامرين احلاهم مر ان جلست مع السوداني راجت عليك الحره ومطاردة الارانب والغزلان وان ركبت اخوياك ماهم بذاك اقصد بصندوق السياره رغم انهم تراهم ينشد بهم الضهر احسن من بعض الناس .
مكيده وقع بها سهيل ولكن ونا اخوك بعلمك وش بسوي انا لو كنت مكانك بس قبلها خذ بعض الثرمده من اخوك وتحملها كيف ماتجي تراك رحيم وعاني ونسيب ومنا وفينا ومنت بعيد عن عوايدنا وسلومنا هذا اذا ماكانت الامور مثل بعض يعني سيم سيم .
الامور معقده ولاهو نقص بالكلاب ( الله يكرمك وكل من يمر على موضوعك ) وعندي استشهاد بالشيخ منقاش او واحد من ربعه بموضوع ناسيه يقول ان واحد من عياله كان يوم كان ساكن ببلاد ( العلوج ) يشوف ورعان الجيران كلا يجر في كلبه معه وبهذله يبي كلب والضاهر انه ( نفص , نفخ ) بمعنى ( زجر ) ولده وانتهى ويعقب والكلام له ( الشيخ , او احد ربعه ) لولا انه نهي عن اقتناء الكلاب دون حاجه لاشترى واحد له والاخر لولده ( مبالغه) وقد صدق فيما قال فكلنا نعلم وفاء الكلاب واخلاصها وكلنا فيما مضى ربينا الكلاب للحراسه من الذياب سواء الحيوان او شبيهه من البشر ( السراق ) لحماية البيت والغنم .
لكن المشكله وانا اخوك العادات وسلوم العرب تمنعنا وليس ( الدين ) من مرافقة الكلاب ويمكن الموضوع يهون لو كان مع اخوان او ابناء عم نقول ( ستر وغطى ) لكن مع ( الاجناب ) وبديره تعتبر غريبه فلا .

وبعدين تعال لو مع مطب ( نقز ) واحد منهم ثم ( قرط ) في وصله منك وش يفكك منه واخاف تقول بهج ثم وقتها تجيك كلها ( مغيره ) عليك تحسبك غزال هي حلها الا البعد غنيمه وترى الخوف ( شجاعه ) كامله مكمله اترك من المثل القديم اللي يقول ( الشرده نص الشجاعه ) لانه بيورطك مع الكلاب ( الله يكرمك والسامعين واللي بيمرون بعد واللي مرو وانتهو من الموضوع ) .

الله يسعدك وتراني رجال اللي في بالي في اصابعي ( يعني اكتبه على طول .
وسلامتك