محاوره بيني وبين متعب محاوره بيني وبين متعب محاوره بيني وبين متعب محاوره بيني وبين متعب محاوره بيني وبين متعب
هذي محاوره دارت بيني وبين ابن أختي الله يحفظه وهي عبارة عن موال .. طبعاً كل الشغله عن طريق رسائل الوسائط .
نتسلى ونتمازح .. فقط لا غير
وحبيت انقلها لكم واتمنى تعجبكم ..
سنا
يا متعب الدنيا تراها قصيره
والارض مهما تتسع مستديره
خلك مع الشيخان واهل البصيره
وانفذ بجلدك عن دروب المتاهات
الذيب دايم فالمراقيب
لو بات طول الليل جيعان
يخطي مرار ومره ايصيب
لكن مايرعى مع الضان
متعب
ياخالي الأيام عندي دواها
والارض دسناها ونعرف مداها
والناس نعطيها على مستواها
نميز الفضه وصرف الجنيهات
الضيف تكفيه التراحيب
لو بات طول الليل طيان
واللي يدور للعذاريب
ماهو محصل غير نقصان
سنا
وين الرجال ملاعبين آلاسنه
كانت لهم فالحرب شنه ورنه
واليوم صاروا بين نارٍ وجنه
كلٍ معه مِزْوادته بعد ما مات
اللي زرع طيب جنى طيب
فازوا بها ذربين الايمان
واللي زرع عوج المشاعيب
لا ينتظر مشمش ورمان
متعب
حنا بوقتٍ فيه صاحي ومجنون
وش يحصي النقاد واللي يعدون
شيٍ بدا واللي ليا الحين مدفون
ما بان منه الا تناتيف وافتات
علمٍ بلا حكمه وترتيب
بندق بلا حبه ونيشان
وارجال ماتعطي المواجيب
ماظنها يصبح لها شان
سنا
النار من شبابها يبن الاجواد
والعلم لا قلناه ماعاد ينعاد
واحنا تجمعنا على غير ميعاد
والهرجه اللي قلتها مابعد جات
بالرغم من كثر المطاليب
الوضع توه ما بعد زان
قلنا حرام وقلت لي عيب
ما تدري ان الفرق شتان
متعب
أنته تقول وفيه غيرك يقولون
والعلم عند مدبر الخلق والكون
وانا على ما قلت ماني بمغبون
البيض وزعناه في خمس سلات
حلوٍ كما دَرْ المحاليب
والا كما همال الامزان
جبته ومثله ما بعد جِيب
تصدير من خفاق طربان
بس
وسلامتكم