[منقاش]

يالله أنك تهدي عبدك الشيخ ابن همام , وتكفيه شر نفسه , وشر شياطين الجن والأنس , وتكفينا معه يا كافي . هذي ألأوله .
والثانيه , وعليكم السلام ورحمة الله وبركاته ...
والثالثه , صدقني لو دريت أن عودتي للحق تبي تغريك على التمادي في الباطل , وتجيني بثقاتك ومسنداتك الخاصه والغاصه , أني يا شيخ ما أعود عن باطلي مهما كلفني .
وبعدين , من اللي قال لك أن ثقاتك موثوقين عند بدر الدجى وعرعرة المنتدى ؟, أنا ما أثق ألا في أثنين بهالمنتدى وهم رويعي الغنم وابن أبي محمد ومعهم الشيخ ملقاط والشيخ ابو سيفين أذا تطابق كلامهم مع كلام ألأثنين ألأولين .. وبعدين من قال لك أن سندك يمكن ألأستناد عليه وهو سند ماله سجل ولا عليه أختام ؟, يعني بله وأشرب مويته.
والرابعه , بخصوص أسم الداب , أنا عمري يزيد على خمسه وثلاثين سنه (35) , سمعت فيه أسماء الديبان كلها بما فيها اللي لها أبو واللي لها أم واللي لقطاء , مثل أم شكوه أو شكي , وابو شراكين وغيرهم , لكن ألأمحوه ما سمعت أحد من الثماليين يسميها أم حوه ألا بعض المخضرمين اللي ما عاشوا في الديره ألا فتره بسيطه ما يعتد بها , وباقي حياتهم في البنادر والديار اللي حادر ..
أما شفطكم للهاء وتحويلها لألف ممدوده والا مقصوره , ونطقكم للحوه حوى , فهذا ماهو مستغرب عليكم بعد تحولتم لمكاويه , يسمون الشبيكه بالشبيكا , واليمانيه باليمانيا , والهده بالهدا , وشبره بشبرا , وليه بليا , وحوه بحوى, وأنت رايح , ومن عاشر القوم أربعين يوما سار منهم , وانتم عاشرتوهم أربعين عام , وترى هالحكمه سندها قوي ولا أسمح لك تشكك فيها , ولها مسندات مستنده على بعضها ...
الثامنه , بخصوص اللون , أنا ما قلت أن لون الأمحوه حمراء , واللي قلته أن لونها يغلب عليه البرتقالي , يعني لون البرتقال أبو صره , ويبدو أن سندك في أللوان من الجيل اللي شاف ألأمحوه قبل يستوردون ربعنا البرتقال وأختلطت عليه ألألوان ..
العاشره , بخصوص حجم ألأمحوه , يبدو يبن عمي أن سندك ما شاف ألا واحد والا أثنين من عيال ألأمحوه , ولا شاف عقال وكبار ألأمحوات , وحكم على البقيه بالصغر بحكم المشاهده , ونسي أن ألأمحوات مثلنا يا ثماله , ورعاننا صغار , ونسواننا ورجالنا كبار , ومع النعمه بعضهم سمن ولا عاد يدخل مع الباب...
الخامس عشر : قصة غار الشهباء , ما عليها أختلاف , ونبصم معك عليها بالعشره , وتتفق مع كل الروايات اللي سمعنا بها , ويتفق وصف حركة ألأمحوه في الجو مع ما شاهدناه على اليوتيوبات .
لكن أحجامك عن ذكر المسافه عليه علامات أستفهام , ولا أدري ليش ما ذكرتها ولو بالتقريب , لأننا واقولها جاد , في أمس الحاجه لمعرفتها؟؟؟..
والخاتمه : أشكرك يبن همام , والكلام يطول ويقصر , والزبده تجي في النهايه اللي ما وصلنا لها بعد , وأن لقينا عميد منتدى الحياه الفطريه متعاطف مع أراءك , فوقتها , نطلبكم تجيبون لنا صورة أمحوتكم , وتنسبونها لربعها (فصيلتها) من الحنشان , وبعدها أن قدرنا ردينا عليكم , والا أنضمينا لكم , وسلامتكم .....

مخاوي الليل : أشكرك على ألأطلاع والتعليق , وخلك متابع معنا دايم في منتدى الفطريات والتراث ,,.