[منقاش]

شاعرنا الملهم ومراقبنا الفطين حليفنا سنا الهجره وفقه الله : عزيمتك وصلت وبيض الله وجهك وكثر الله من أمثالك , وليت الوقت يسمح حتى أتشرف بمقابلتك يبو عبدالله , لكن الرحله بالكاد نلحقها أنا والوفد المرافق لفخامتنا أذا نزلنا من رحلة الطايف في مطار الرياض , يعني حتى لو بغى أحد يقابل سماحتنا في المطار ويكحل عينه بشوفتنا ما أمدينا نشوفه ولا أمديه يشوفنا .
لكن مكان المقابله الطبيعي في الطايف في أجازه من أجازاتك في بيت ابو نقشه , وفي الديره المباركه اللي ما يقدر المخاوي يحط قدمه على ترابها الطاهر ويبثنها.

حليفنا الوفي عميد منتدى الرحلات الشيخ ابو سيفين حفظه الله : الحمد لله على عودتكم لأرض الوطن سالمين وغانمين أن شاء الله .
والحقيقه أن المنتدى فقد مزازيته بعدك , وبدا خاوي ذاوي وهاوي ألأركان , وأبتدت التصدعات تظهر في كل جنب من جوانبه خلال فترة غيابكم , وابتدا الهواش يعلا ويظهر للأسف حتى بين أعضاء وعقال منتدى الحياة الفطريه اللي ساروا حزبين متصارعه , حزب الزرق وحزب الصفر , وتعال تسمع على الحزبين وعلى هتافاتهم لا بلاك الله , ألعب يالأصفر , ألعب يالأزرق.
والزبده , الوفد مسافر مساء ألأربعا لأرض الفضه والخضره , وترى المنتدى من ذمتنا في ذمتكم في فترة غيابنا , يعني وجهوهم بالتي هي أحسن واللي يجنب عن الدرب باللي جنبها واللي يزودها وقفوا عضويته , وانتبهوا لأبو عبدالرحمن ترون المخاوي غواه وموديه في داهيه , وأصبح بسبب وسوسته له يلعب بالحجر والبيضه , ويصعق مع الراعي وياكل مع الذيب خصوصا في غيبات بدر الدجى , لأنه ما أحد يقدر يرفع راسه في حضور العرعره , وباقي العلوم نكملها على التلفون أن شاء الله...