[السنافية]

فتاة بدوية ترد على طالبة جامعية متحضرة ...!!!


إيــه بـدويــة ريـحـتـي بُـــن وبـهــار
هـذا شـرف مـاهـو بحـقـي خطـيـة

أنــا بـدويـة بـنـت حــرٍ مــن أحـــرار
فـزعـات ربـعـي بالـشـدايـد قـويــة

أناهـلـي يابـنـت وافـيــن الأشـبــار
كـأنـك جهلـتـي مـــن أنـــا ياغـبـيـة

ياجاهلة ماتغتذي الشمس الأنـوار
حنا كما شمسٍ على الأرض ضيـه

حنٌـا هـل الطـولات هيـبـة ومـقـدار
حـنــاٌ مـثــال لـلـشــرف والـحـمـيـة

حـنٌـا الطنـايـا للـكـرم رمــز وشـعـار
حــنٌــا خــــويٍ مـايـخـلــي خــويـــه

الذيب يوم إنه عوى وسط الأسعار
عشـوه ربعـي مــن سنـيـنٍ مـديـه

يـوم إن جـدك وتٌـق القـفـل بـالـدار
بيت الشَعـر مفتـوح صبـح وعشيـة

للـضـيـف ريـــف للمـعـاديـن جـبــار
نـــرد الـعـيـاض ولانـهــاب الـمـنـيـة

يابنت لو بكتب من أشعار وأشعـار
تعـجـز معـانـي حـروفـي الأبجـديـة

اللعـب خلـي اللعـب لعيـال شطـار
لاتدخلـيـن السـيـل وانـتــي نـديــة