منقاش الرياضي

[منقاش]

منقاش الرياضي منقاش الرياضي منقاش الرياضي منقاش الرياضي منقاش الرياضي

في أيام شبابي كنت أتلقى واتشربط الحجيب وارقى البيار واتعرقش أطول شجره , وفي السداح والطراح ما كان أحد يلاقيني ,,, ألا للأمانه أثنين من ألجماعه ما أنا قدهم , واللي هم رويعي الغنم وراعي السواني ..
الشبختان اللي تعرفونهم اليوم مثل ابو تركي وابن عزاب وابو عادل وابن داخل وابن سلمان وابو نايف وابو نشقه وحسن عابد وابو عبد الرحمن وابو أمجد وابو خالد والمشيلحي وابن عواض والنتيف وما فيه فرامل , كلهم كانوا الهابين أكبر مني في السن واجد لكن اذا أنحرفت عليهم يجفلون شريد يهذون قدامي مثل الجفار ..
المهم ,,ما هذي قصتنا .. القصه أني كنت في الصيف أذا طلع المكاويه للطايف يصيفون أهبط ببضاعتي السوق على حماري , وتعرفت مره في هبطه من هبطاتي على شيخ المكاويه عمدة حارة الشبيكه ( أتذكر أن أسمه العمده مروق المنقه ,, ما عاد أشوفه وأظنه قتل في المعارك ألأخيره اللي جات بيننا وبين أتباع الهتيمي أبو تركي) ,, وكان دايم أذا شافني في السوق يحلف عليه ويعزمني ويلزم ويتشدد واذا أستعزمت ما القى قدامي في بيته لا ذبيحه ولا غدا ولا عشا ,,, بالكثير براد شاهي وتعميرة شيشه وانا ما أشربها وغليوني في سحكلي سادني عنها وعن كركرتها .. ما علينا ,, يمكن كان يقول في نفسه منقاش بدوي ما يستاهل وانا أقول هذا مكاوي ما يفهم سلوم العرب ..
ومره من المرات طاح الوجه في الوجه في وسط السوق وأخذني بالأحضان وكثر في العزيمه وقال : والله أوحشتني يا واد منقاش يا ## ,, يا أبو بدوه فينك ما عاد تنشاف ؟؟ , رديت عليه : يا عمده تراك زليت عليه يوم تقلي ## وأظنك تبيني أجمع عليكم كبار ثقيف ياخذون الحق لي منكم يا مكاويه ,, وبعدين , لي من عزايمك الفكه اللي كلها براد شاهي وتعميره وشوية قلط .. نحنا يا عمده أذا دخل الضيف حلالنا نلاقيه بالطيب والترحيب والصفاط والدلال اللي تعاقب ويقفاها السمن والسمينه والعلوم المزيونه ,, وهذا طبعنا وسلوم ربعنا للضيف اللي نعرف واللي ما نعرف ,, وهذا قدر بيوتنا وقيمة فرشنا ,, وان كنت مشكك في كلامي الله يحيك ضيفني في الديره أنا والا واحد من ربعي وشوف العلوم اللي تنومس ما هي ثرامدك وبربستك يا عمده ..
رد عليه : شوف يا واد منقاش ,, البيت عندنا للوليه مو للرجال,, لكن أنا أعزمك تروح معايه لمباراه بين فريقين كوره أنا أشجع واحد منهم في جده ,,, ورايح أبسطك واوريك البحر والبوابير اللي تجيب ألأرزاق من الخارج ونجلس هناك يومين ,,, وكله على حساب صاحبك العمده الخاص وضيافته من يوم تمشي معايه من الطايف لمن ترجع ألطايف , ما تخسر من كمرك قرش واحد ,, أش قلتلي يا واد منقاش ؟؟.
رديت على العمده : البحر والبوابير نفسي أشوفها , وتراني عوام ما أخاف من الماء وغواص أجيب الحجر من قاعة البير ,, أما الخنزيره اللي مليانه هوى ويرفسونها ما أبيها وناقد اللي يلعبون بها واللي يتفرجون عليها ,, لكن وش يودينا جده سد البحور في ديار ما نعرفها ولا نعرف أحد فيها ؟؟, وحماري ويش السواه معه , ووين أخليه لحاله في الطايف ؟...
رد عليه العمده : يخرب بيتك يا واد يا بدوي ,, باين مخك مزرقن .. حمارك كمان يبقى في الطايف لمن ترجع في ضيافتي ,, وبعدين يا سربوت مين اللا قلك أن جده سد البحر ؟؟. جده هنه قريبه يا واد ,,, بس قول تم وانته ما لك شغل ,, رديت عليه : تم , تم ياعمده وبيض الله وجهك والله يعينك ويكثر من أمثالك ..
باقي القصه في الحلقه الثانيه اللي تبي تشوفون فيها عزوتكم ورفيقكم منقاش في ضيافة العمده , وتشوفونه كورجي ورياضي ما شافت جده في تاريخها مثله ,, لا تفوتكم ...

[@ بن سلمان @]

منقاش
صدق مالك خوي !!
بس قول لي الصدق يا واد يومك تروح مع العمدة كم كان عمرك يومتها ؟

[النتيف]

من يومك يا منقاش مالك صاحب على قول بن سلمان وما عرفلك إلا أبو تركي
حتى حمارك اللي تقول ما تستغني عنه وتتغزل في صوته وأذانيه وترقده معك في الغرفة خليته في الطائف ورحت سد البحر على قولك تبي العمده يوريك البوابير
نبي نحتري الحلقه الثانيه ونشوف العمده وش وراك في جده ياللي مسوي رياضي

[ابو عادل]

أكيد العمدة لبسك البقشة والصديري ووراك الغزالة اللي تطحن سمسم ياواااااااااااااد.

[مشاكس]

يا واد يا منقاش
ترى الناس هدولا حقون مكه يحبون المقالب للواحد
انتبه عاد يا واد لا يعطوك مقلب

[أبو عبدالرحمن]

أفا عليك يا منقاش

يجي منك هذه العلوم ..

أشوف يوم فيك مع هذا العمدة ـ يأخذ حقنا منك ـ

[أبوخالد]

عرفنا دربك يامنقاش
اقول ماوراك القطار المغرز

ياجماعه هذي صورة منقاش بعد الحرب
#

[بن داخل]

الله يسعدك يابو خالد
العرب ماصدقوني يوم قلت لقيته متروب وجهه
وقفاه وأملط #
هذا الدليل على صدق روايتها
وترون الصندل اللي في رجله سارقه من المسكين
مشتاق ورشمة الحمار جنبه بعد مامات من جنون الحمير

[ABO TURKI]

أحسنت يا ابو خالد في نشر هذي الصورة
خلي الناس تشوف منقاش على حقيقته بعد الحرب
لا وبعد لا قيه عند الاشارة يبيع مناديل
قلنا له استسلم واهجد ماانت قد ابو تركي ما يسمع
وتخلوا عنه زمرته وين مشتاق ووين ابو عادل و و و و
#
الله لا يبتلينا عموما هذي نهاية كل طاغية ولك فيمن سبقوك أسوة ولكنك ما عندك ما عند جتي الله يرحمها وبشبش الطوبة اللي تحت راسها ويجعلك بطوبة وسط راسك
تفقشك لين يظلي راسك مغنبج

[أبو علي]

خبل منقاش شوف شكلك هذا